तीन बिरामीको हत्या गरेकी नर्स भन्छिन्, ‘कुनै पश्चाताप छैन’
टोक्यो: उपचारको क्रममा तीन बिरामीको हत्या गरेको आरोप लागेकी जापानकी एक पूर्वनर्सले आफ्नो अपराध स्वीकारेकी छन् । उनले सन् २०१६ मा आफूले श्रृंखलावद्ध तरिकाले तीनजना बिरामीको निर्ममतापूर्व हत्या गरेको स्वीकारेकी हुन् ।
नर्सले बिरामीको हत्यापछि पनि आफूलाई कुनै पश्चाताप नभएको बयान दिएकी छन् । आफूले बिरामीको हत्या गर्नुको कारण खुलाउँदै उनले भनेकी छन्, ‘म मेरो पेशाबाट शारीरिक र मानसिकरुपमा थकित भइसकेकी थिए । आफू मरेर अरुलाई बचाउन नसक्ने अवस्थामा पुगेपछि मैले तीनै बिरामीको हत्या गरे । गल्तीबिना मैले मेरो काम गरेको मात्र हो । यसमा मलाई कुनै पश्चाताप छैन ।’
हत्या स्वीकारेकी उनलाई हाल योकोहामा जिल्ला अदालतमा राखिएको छ । अदालतले पीडितका आफन्त, आरोपितका बुवाआमा र अन्य कर्मचारीको बयानका आधारमा सजाय सुनाउने बताइएको छ । उनलाई कम्तीमा पाँच वर्षदेखि जन्मकैदको सजाय हुन सक्ने अदालतले जनाएको छ ।
को हुन् ती नर्स ?
जापानको योकोहामास्थित ओगुची अस्पतालमा कार्यरत थिइन्, ३४ वर्षीय आयुमी कुवोगी । सन् २००८ मा नर्सको प्रमाण पत्र पाएकी उनले सोहि वर्षदेखि आफ्नो करियर सुरु गरिन् । करियरसँगै उनी विरामीको सेवामा ८ घण्टाभन्दा लामो समयसम्म खटिने गर्थिन् । सुरुवाती चरणमा बिरामीको राम्रो हेरचाह र उपचार गर्ने आयुमी तोकिएको समयभन्दा लामो समयसम्म बिरामीको सेवामा समर्पित हुन्थिन् ।
उनले गरेका कतिपय उपचार सफल बन्थे भने कतिपय असफल । असफल उपचारपछि उनले बिरामीको ज्यान जोगाउन असमर्थ हुन्थिन् । आफूले गरेको उपचार असफल बनेपछि आयुमी डिप्रेसनको सिकार बनेकी थिइन् । डिप्रेसनको उपचारस्वरुप आयुमीले निदाउने औषधि सेवन गर्ने गरेकी थिइन् ।
असफल उपचारपछि आयुमीलाई सन् २०१५ मा ओगुची अस्पतालमा आगामी २५ वर्षको लागि खटाइएको थियो । जहाँ उनीकहाँ उपचार गर्न आउने अधिकांश बिरामी बुढापाका र दिर्घकालीन रोगी हुन्थे । उनको डिप्रेसन झनै बढेको थियो ।
यसरी भएको थियो हत्या
उपचारको लागि ओगुची अस्पतालमा भर्ना भएका तीन जनाको ज्यान जाने गरी भएको सो घटना सन् २०१६ सेप्टेम्बरमा भएको थियो । तिनै बिरामीलाई एक महिनाको अन्तरालमा मार्ने योजना बनाएको आरोपित नर्सले बताएकी छन् ।
आफ्नो पेशाबाट थाकेकोले बिरामीको सलाइनमा डिटर्जेन्ट सोडा मिसाएर तिनवटै बीरामीको हत्या गरेको अदालतसामु बयान दिएकी छन् । ‘पेशाको कारण म थकित थिए । हत्या गरिसकेपछि मेरो शरीर र मस्तिष्क दुवैलाई राहत मिलेको थियो । त्यसैले मलाई अझैपनि कुनै पश्चाप छैन’ अदालतसँगको बयानमा उनले भनेकी छन् ।
नर्स कुवोगीले हत्या गरेका दुई बिरामी ८८ वर्षका थिए भने एक बिरामी ७८ वर्षका थिए । तत्कालिन समयमा सो घटनाले जापानमा निकै चर्चा कमाएको थियो । उनले आफूले गरेको अपराध सन् २०१८ मा स्वीकारेकी थिइन् । यद्यपि मानसिक रोग डिप्रेसनको कारण उनले बिरामीको हत्या गरेको भन्दै अदालतले हत्याको सजाय सुनुवाइमा ढिलाइ गर्दै आएको थियो ।
अदालतले उनको अपराधको सजाय आगामी नोभेम्बरमा सुनाइने बताइएको छ ।
- (रिपोर्टर हानाको मोन्टागोमेरिले भाइस न्युजको लागि गरेको रिपोर्टिङमा आधारित अनुवादीत अंश ।)