भाइरल रोड बग्यो : कर्णाली, सेती र महाकाली खतराको तहभन्दा माथि

सुदूरपश्चिम व्यूरो : असोज ३१ गतेदेखि परेको अविरल वर्षाले सुदूरपश्चिममा वितण्डा मच्चाएको छ । कञ्चनपुरको भीम दत्त नगरपालिकामा २ सय परिवार विस्थापित भएका छन् भने कैलालीका विभिन्न स्थानका एक सय परिवार विस्थापित भएका छन । भित्र्याउनै लागेको धानबाली बगाएको छ ।

पहाडि ७ जिल्ला जोडने भीमदत्त राजमार्ग १६ घण्टादेखि बन्द छ । अविरलरुपमा वर्षा हुने क्रम जारी रहेकाले यसले ठूलो क्षति हुनसक्ने मौसम विज्ञान विभागले पूर्वानुमान गरेको छ । महाकाली नदीमा पानीको सतह खतराभन्दा माथि पुगेको छ। एकलाख क्वीसेकमा खतरा मानिने महाकालीमा मंगलबार बिहान ९ बजेसम्म ४ लाख ७८ हजार क्वीसेक पानी मापन गरिएको छ ।

यस्तै बाढीले भीमदत्त नगरपालिकाको ऐरी, भुजेला क्षेत्रका २ सय परिवार विस्थापित भएका छन। उनीहरु त्यहाँको एक नीजि बोर्डिड स्कुलमा बसेको कञ्चनपुरका प्रमुख जिल्ला अधिकारी शिद्धराज न्यौपानेले बताए । महाकाली नदीमा निर्माणाधिन चार लेनको पुलको पूर्वतिरको क्षेत्रमा बनिरहेको कालोपत्रे सडक बाढीले बगाएको छ ।

निर्माणाधीन पुल पनि खतरामा परेको छ । कैलालीमा सय परिवार विस्थापित भएका छन् । सबैभन्दा बढी, टीकापुर, भजनी, रामपुर क्षेत्रमा डुबान भएको छ । सोमबारसम्म धानको चिन्ता गर्ने किसानहरु अब डुवानमा परिने पो कि भन्ने चिन्तामा छन्।

कैलालीका निमित्त प्रमुख जिल्ला अधिकारी हिरालाल चौधरीले, रामपुर टीकापुर भजनी क्षेत्र डुवानको खबर आएको बताए । उनले प्रहरी, शसस्त्र प्रहरी र नेपाली सेनाका टोलीहरु डुवानग्रस्त क्षेत्रमा खटाइ सकिएको बताए।

कैलालीमा पर्ने कर्णाली नदीको जलस्तर पनि खतराभन्दा माथि गइसकेको छ । कर्णालीमा १० दशमलव ८० मिटर पानी खतराको संकेत हो तर कर्णालीमा बिहान ९ बजेसम्मको जलस्तर ११ मिटर नाघिसकेको छ । मौसम पूर्वानुमान महाशाखाले वर्षा भइरहेकाले तटीय क्षेत्रका जनतालाई सुरक्षित रहन आग्रह गरेको छ। धनगढी बजारको विसालनगर, शिवनगर पनि पूरै डुवानमा परेको छ । सुदूरपश्चिमका पहाडि जिल्ला जोडने एक मात्र भीमदत्त राजमार्ग सोमबार दिउँसोदेखि भासु भीर नजिक अवरुद्ध भएकाले विरामी बोकेका एम्बुलेन्स, सर्वाजनिक सवारी साधनहरु बाटोमै रोखिएका छन् ।

कैलालीको चुरे गाउँपालिकाको खीमडीमा एक दम्पत्ती ठुलीगाडको भंगालामा फसेका छन्। दुबैजनाको हेलिकोप्टरबाहेक उद्धार गर्न नसकिने भएकाले हेलिकोप्टरका लागि गृह मन्त्रालयमा छलफल भइरहेको निमित्त प्रमुख जिल्ला अधिकारी हिरालाल चौधरीले बताए ।

कैलालीका निमित्त प्रमुख जिल्ला अधिकारी हिरालाल चौधरीले पानी परिरहेकाले सडक खुलाउन समस्या भइरहेको बताए । उनले सडक खुलाउने कार्य भइरहे पनि पहिरो आउने क्रम जारी रहेको बताए । यस्तै डोटी सदरमुकाम दिपायल बजार खतरामा परेको छ । सेती नदी पुलमाथिबाट बग्न थालेको छ । मौसम विज्ञान विभागले महाकाली, सेती र कर्णाली नदीमा २०७० साल पछिकै ठूलो जलस्तर बढेको बताएको छ।