महाकाली र कैलालीको टापुमा ७ जना फसे, खराब मौसमले हेलिकोप्टर पुग्न सकेन
कात्तिक २, २०७८ मंगलबार ११:५८:०
महेन्द्रनगर : अविरल वर्षाले कञ्चनपुरमा पर्ने महाकाली र कैलालीको ठुलीगाडको भंगालोमा फसेका ७ जना उद्धारको पर्खाइमा छन् । कञ्चपुरको भीमदत्त नगरपालिका -९ खल्लामसेटी भन्ने स्थानमा सोही स्थानका ५ जना महाकालीको भंगोलमा फसेका हुन्।
सुदूरपश्चिम प्रदेशकी आन्तरिक मामिलामन्त्री पूर्णा जोशीले उद्दारका लागि हेलिकोप्टरको व्यवस्था भइसकेको बताइन्। ‘सुर्खेतमा नेपाली सेनाको हेलिकोप्टर छ तर मौसम खराबीका कारण उड्न सकिरहेको छैन, मौसममा सुधार आउने वित्तिकै उद्धार हुन्छ,' उनले भनिन् ।
मन्त्री जोशीका अनुसार सुदूरपश्चिम प्रदेशका डीआइजीसहितको टोली खल्लामसेटी पुगेको छ । उनीहरुको ट्युबबाट उद्धारको प्रयास गरिए पनि महाकालीमा साढे चार लाख क्वीसेक पानीको बहाव रहेकाले उद्धार गर्न सकिएको छैन ।
कैलालीको चुरे गाउँपालिकाको खिमडीका लोकबहादुर बुढामगर सधैं ठुलीगाडको बगरमा तरकारी लगाउँछन्। यसपाली पनि उनी बगरखेतीका लागि त्यहाँ गएका थिए । ५० वर्षीय बुढामगर र उनकी श्रीमती अचानक परेको वर्षाका कारण त्यही फसेका छन् ।
मंगलबार बिहानदेखि सातैजनाको उद्धारका लागि प्रयास गरिएपनि मौसम खराबीका कारण उद्धार हुन सकेको छैन । कैलालीका निमित्त प्रमुख जिल्ला अधिकारी हिरालाल चौधरीले मौसममा सुधार आउने वित्तिकै हेलिकोप्टरबाट उद्धार गरिने बताए ।
उता डडेल्धुरामा पर्ने महाकाली नदी र रंगुन खोलामा फसेका पाँचजनाको भने नेपाल प्रहरीले ट्युबबाट उद्धार गरेको छ । नेपाल प्रहरीका प्रदेश प्रवक्ता एसएसपी विक्रमबहादुर चन्दले डडडेल्धुराका पाँचैजनाको सकुशल उद्धार गरिएको बताए।
प्रतिक्रिया दिनुहोस !
