साउदीबाट फर्किए ५२ हजार नेपाली
साउदी अरेबिया : साउदी अरेबियामा कोभिड १९ को असर र विभिन्न कारणले अलपत्र परेका नेपाली स्वदेश फिर्ता हुने संख्या दैनिकी रूपमा बढ्दो छ । नेपाल एयरलाइन्स, हिमाल एयरलाइन्स, एयर अरेबिया, फ्लाई दुबई, अल जजीरा तथा सलाम एयरलाइन्स गरि चार्टर्ड उडानबाट हालसम्म ५२ हजार ७ सय ८६ जना स्वदेश फिर्ता भएका छन् ।
साउदीस्थित नेपाली दूतावास रियाद तथा वाणिज्य दूतावास जेद्धाको सहयोगार्थमा साउदी सरकारले हालसम्म कम्पनीमा कार्यरत रहँदा अकामा नविकरण नगरेका २ हजार १ सय बढि नेपालीलाई बहिर्गमन भीषा उपलब्ध गराएको छ ।
दूतावास रियाद तथा बाणिज्यदुत जेद्धाले साउदीमा कार्यरत नेपालीको पासपोर्ट नविकरण लागि आफ्नो फेसबुक पेजमार्फत आवश्यक विवरणसहित अनलाइन फारमको व्यवस्था गरेको छ। पुन: नवीकरण र पासपोर्टको नविकरणका लागि आवश्यक कागज संकलनको सहजीकरणका लागि साउदीका विभिन्न सहरमा अस्थायी कार्यालयको समेत व्यवस्था गरेको छ ।
दूतावास रियाद र बाणिज्य दूतावास जेद्धाका अनुसार हालसम्म १ सय १५ जना नेपालीको कोरोना भाइरसबाट मृत्यु भएको छ।
साउदीमा कार्यरत घरेलु कामदारहरूको पनि बिमा अनिवार्य हुने भएको छ। बिमा नगरी कामदार ल्याउन र राख्न नपाइने भएको छ । घरेलु कामदारमा घरमा काम गर्ने डोमेस्टिक हेल्पर, हाउस ड्राइभरलगायत विभिन्न विधा रहेका छन् भने बिमासम्बन्धती यो नयाँ नियमबाट घरेलु कामदार र घर मालिक दुबैलाई सुरक्षा र सुविधा मिल्ने भएको छ ।
कोरोना भाइरसबाट साउदीमा ५ लाख ४८ हजार २ सय ५२ जना संक्रमित हुनुको साथै ८ हजार ७ सय ७८ जनाको मृत्यु भएको छ भने ५ लाख ३७ हजार २ सय ८२ जना निको भएका छन् ।