बागमती प्रदेशको मुख्यमन्त्रीमा राजेन्द्र पाण्डे नियुक्त
कात्तिक ११, २०७८ बिहीबार १६:२:०
हेटौंडा : नेकपा एकीकृत समाजवादी बागमती प्रदेश संसदीय दलका नेता राजेन्द्र पाण्डे बागमती प्रदेशको तेस्रो मुख्यमन्त्री बनेका छन् । नेकपा माओवादी केन्द्र, नेपाली कांग्रेस, जनता समाजवादी पार्टी र एकीकृत समाजवादीका गरी कुल ५९ प्रदेशसभा सदस्यको समर्थनमा प्रदेश प्रमुख यादवचन्द्र शर्माले पाण्डेलाई मुख्यमन्त्री नियुक्त गरेका हुन् ।
नेपालको संविधानको धारा १६८ को उपधारा २ बमोजिम कुनैपनि दलको बहुमत नरहेको अवस्थामा दुई वा दुईभन्दा बढी दलहरुको समर्थनमा बहुमत प्राप्त प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्नसक्ने प्रावधान छ । पाण्डेले मुख्यमन्त्री नियुक्तिलगत्तै पद तथा गोपनीयताको सपथ लिएका छन् ।
गत भदौ २५ गते नेकपा एमाले विभाजनपछि भदौ २७ गते नेकपा एकीकृत समाजवादीमा आवद्ध १३ जना प्रदेशसभा सदस्यले मुख्यमन्त्री अष्टलक्ष्मी शाक्यलाई दिएको समर्थन फिर्ता लिएको थियो । विश्वासको मत लिनैपर्ने कानुनी प्रावधानअनुसार अघि बढेकी शाक्यले अन्ततः विश्वाको मत नलिइ कात्तिक १० गते राजीनामा दिएपछि पाण्डे मुख्यमन्त्री बनेका हुन् ।
धादिङ क्षेत्र १ ९क० मा एमालेबाट निर्वाचित पाण्डे २०१३ साल जेठ २९ मा धादिङ गजुरीमा जन्मिएका थिए । राजनीतिमा आउनुअघि शिक्षण पेशामा आबद्ध उनले ग्रामीण विकासमा स्नातकोत्तर गरेका छन् । २०३६, २०३८ र २०४२ सालमा सम्पन्न शिक्षक आन्दोलनको नेतृत्व समेत गरेका पाण्डे नेकपा मालेको सहसचिव हुँदै २०४३ मा जिल्ला पञ्चायत सभापति भएका थिए ।
पाण्डेले २०५० वैशाख २० नेपालगन्जमा सम्पन्न छैटौं महाधिवेशनबाट अञ्चल सचिवको जिम्मेवारी सम्हालेका थिए । उनी २०५५ मा केन्द्रीय सदस्य भए । धादिङमा नेकपा एमालेका तर्फबाट २०४८, २०५१, २०५६ र २०७० को संसदीय निर्वाचनमा विजयी भएका उनी हाल नेकपा एकिकृत समाजवादीका उपाध्यक्ष छन् । यस अघि पाण्डेले स्थानीय विकास मन्त्रीको जिम्मेवारी सम्हालिसकेका छन् ।
चार सदस्यीय मन्त्रिपरिषद् विस्तार
बागमती प्रदेशका मुख्यमन्त्री पाण्डेले चार सदस्यीय मन्त्रिपरिषद गठन गरेका छन् । सत्ता गठबन्धनमा रहेको दल नेकपा माओवादी केन्द्रबाट कुमारी मोक्तान सामाजिक विकास मन्त्री बनेकी हुन् ।
१६ वर्षको उमेरमा सशस्त्र युद्धमा होमिएकी महिला लडाकु मोक्तान नेकपा माओवादी केन्द्रबाट मकवानपुर २(क) मा प्रदेशसभा सदस्य निर्वाचित भएकी थिइन् । २०६३ सालमा संसद सदस्य मनोनित भएकी मोक्तान २०६४ सालमा मकवानपुर ४ नम्बर निर्वाचन क्षेत्रबाट संविधानसभा सदस्य निर्वाचित भएकी थिइन् । नेपाली कांग्रेसबाट प्रदेश संसदीय दलका उपनेता कृष्णलाल भँडेल भौतिक पूर्वाधार विकासमन्त्री नियुक्त भएका छन् ।
उनी भक्तपुर क्षेत्र नम्बर १ ९क० मा नेपाली कांग्रेसबाट विजयी भएका हुन् । यस्तै नेकपा एकिकृत समाजवादीबाट प्रदेश संसदीय दलका उपनेता कृष्ण प्रसाद शर्मा खनाल आन्तरिक मामिला तथा कानून मन्त्री नियुक्त भएका छन् ।
मुख्यमन्त्री शाक्यको पालमा उनी सामाजिक विकासमन्त्री नियुक्त भएका थिए । तर नेकपा एमाले विभाजनसँगै उनले मन्त्रीबाट राजीनमा दिएर समाजवादी रोजेका थिए । खनाल चितवन १(ख) मा नेकपा एमालेबाट निर्वाचित भएका हुन् ।
प्रतिक्रिया दिनुहोस !
