किम जोङ उनको २० केजी तौल घट्यो
सिओल : उत्तर कोरियाली नेता किम जोङ उनले २० किलो तौल घटाएका छन् । दुई वर्षको अवधिमा करिब २० किलोग्राम (४४ पाउण्ड) तौल घटेको हो । उनको तौल घटेपनि उनी स्वस्थ्य रहेको दक्षिण कोरियाली गुप्तचरहरुले बताएका छन् ।
दक्षिण कोरियाको नेसनल इन्टेलिजेन्स सर्भिस (एनआइएस) का गुप्तचरले नीति निर्मातासमक्ष उत्तर कोरियाली नेता किमको स्वास्थ्य अवस्था र उनको आगामी योजनाबारे संक्षिप्तरुपमा सो जानकारी दिएका हुन् ।
किमको तौल, स्वास्थ्य अवस्था र आगामी योजनाबारे बुझ्न गुप्तचरहरुले आर्टिफिसियल इन्टेलिजेन्स प्रविधि प्रयोग गरेको बताइएको छ। खाद्य र आर्थिक संकटको सामना गर्न किमले आगामी योजना बुनिरहेको समेत उनीहरुले बताएका छन् ।
पछिल्लो समय उत्तर कोरियाले आयोजना गरेका विभिन्न कार्यक्रममा ३७ वर्षीय किम पातलो देखिएको समेत गुप्तचरहरुले बताएका छन् । एनआइएसका अनुसार हाल किमको तौल १४० केजी (३०८ पाउन्ड) बाट घटेर १२० केजी (२६४) पाउन्ड पुगेको छ । किमको उचाई भने ५ फिट ८ इन्च (१७९ सेन्टिमिटर) रहेको अन्तर्राष्ट्रिय समाचारमाध्यले जनाएका छन्।
एबीसी न्युजबाट