सयपत्रीले ढकमक्क भलामचौर (फोटोफिचर)

बेसीसहर : वरिपरी सेता हिमाल। गुचुमुच्च परेका सुन्दर घरहरु । बारीमा लहलह फलेका धानबालीसँगै टनेलमा फलेका तरकारी र फूलखेतीले पर्यटकीय गाउँ भलामचौरको सुन्दरता झनै बढाएको छ ।  मस्र्याङ्दी गाउँपालिका-९ मा पर्ने पर्यटकीय गाउँ भलामचौरमा गरिएको सयपत्री फूलखेतीले आन्तरिक पर्यटकसँगै आम्दानी पनि बढाएको हो । 

सितेबा ग्रुप अफ कम्पनीले स्थानीयसँग मिलेर भलामचौर गाउँमा तरकारी खेतीसँगै फूलखेती गरेको हो । तिहारको समयमा स्थानीय बजारमा भारतबाट फूल आयात हुनेगर्छ । स्थानीयस्तरमा हुने फूलखेतीले जिल्लामा भारतीय फूलको आयात विस्थापन गर्न सहयोग पुग्ने सितेबा ग्रुप अफ कम्पनीका अध्यक्ष एवं कलाकार मधुसुधन पाठकले बताए ।

फूलखेतीले आम्दानीसँगै पर्यटक आगमन पनि बढाएको छ । फुलबारी घुम्न र फोटो खिच्न पर्यटकहरु आउने गरेका छन् । हिमालको काखमुनी गरिएको तरकारी र फूलखेतीले झनै सुन्दरता बढाएको नुवाकोटबाट आएका पर्यटक विकल्प पाठक बताउँछन् ।

तरकारी र अन्य खाध्यबाली भन्दा फूलखेतीमा कम लगानी र बढी आम्दानी गर्न सकिने कृषि विज्ञहरु बताउँछन् । अन्य बालीसँगै फूलखेती पनि गर्नसके किसानले बजारको समस्या भोग्नु नपर्ने कृषि विज्ञ कृष्ण कृष्ण न्यौपानेले बताए । 

तिहारबाहेक पर्यटकीय गाउँमा पर्यटकको स्वागत र विदाइका लागि पनि फूल र मालाको प्रयोग गरिन्छ । गाउँमा आउने पर्यटकलाई फूलको मालाले स्वागत र विदाइ गर्ने गरिएको भलामचौर मृचे होमस्टे सञ्चालक समितिको अध्यक्ष लु कुमारी गुरुङले बताइन् ।