नियुक्त भएको केही घण्टामै स्वीडेनकी पहिलो महिला प्रधानमन्त्री अन्डेर्सनले दिइन् राजीनामा
मंसिर ९, २०७८ बिहीबार ८:३:०
स्वीडेनकी पहिलो प्रधानमन्त्री माग्डालेना अन्डेर्सनले प्रधानमन्त्रीमा नियुक्त भएको केही घण्टामै राजीनामा दिएकी छन्। उनलाई बुधबार बहुमत संसदले प्रधानमन्त्रीमा समर्थन गरेपछि उनी प्रधानमन्त्री घोषित भएकी थिइन्।
निवर्तमान अर्थमन्त्रीसमेत रहेकी अन्डेर्सनलाई प्रधानमन्त्रीमा विपक्षीले समर्थन फिर्ता लिएपछि उनले राजीनामा दिएकी बीबीसीले जनाएको छ। उनको राजीनामासँगै बजेटसमेत पारित हुन नसकेको समाचारमा जनाइएको छ।
उनको गठबन्धन साझेदार रहेको ग्रीन्स पार्टीले आफूले ‘उग्र दक्षिणपन्थीसँग पहिलोपटक मस्यौदा गरिएको’ बजेट स्वीकार गर्न नसकेको जनाएको छ।
अन्डेर्सनले आफूले अब एकल पार्टी नेतृत्वको सरकारको प्रधानमन्त्री हुन कोशिश गर्ने बताइन्। ‘कुनै एक पार्टीले छोडेपछि गठबन्धन सरकारले राजीनामा दिनुपर्ने संवैधानिक अभ्यास रहेको छ’, उनले भनिन्, ‘वैधानिकतामाथि प्रश्न उठ्ने सरकारको नेतृत्व गर्न चाहन्नँ।’
प्रतिक्रिया दिनुहोस !
