यसरी सुरु भयो सुदूरपश्चिममा कांग्रेस प्रदेश अधिवेशन (फोटोफिचर)
धनगढी : नेपाली कांग्रेसको १४ औँ महाधिवेशनअन्तर्गत बिहीबारदेखि प्रदेश अधिवेशन सुरु भएको छ। सुदूरपश्चिममा पनि कांग्रेस प्रदेश अधिवेशन सुरु भएको छ । धनगढीको ओम पार्टी प्यालेसमा प्रदेश अधिवेशन सुरु भएको हो ।
अधिवेशनको पार्टी सभापति तथा प्रधानमन्त्री शेरबहादुर देउवाले भच्र्युअल माध्यमबाट उद्घाटन गरे। प्रदेशका ९ वटै जिल्ला कैलाली, कञ्चनपुर, बैतडी, डडेल्धुरा, दार्चुला, डोटी, बझाङ अछाम र बाजुराका प्रतिनिधिहरु धनगढी पुगिसकेका छन्। पहाडि जिल्लाबाट नेता तथा कार्यकर्ताहरु आउनेक्रम जारी रहेको अधिवेशन मुल आयोजक समितिले जनाएको छ ।
नेपाली कांग्रेसको सुदूरपश्चिम प्रदेश सभापतिका लागि आकांक्षी कांग्रेस नेताहरुले दौडधुप तीव्र बनाएका छन् । आकांक्षीहरु उम्मेदवारी घोषणा गरेर प्रचारप्रसारमा जुटेका छन् । अछामका पूर्वराज्यमन्त्री गोविन्दबहादुर शाह, बझाङ घर भएका पूर्वराज्यमन्त्री तथा पूर्वराजदूत अर्जुनजंगबहादुर सिंह र नेपाल विद्यार्थी संघका पूर्वकेन्द्रीय उपाध्यक्ष डोटीका नेता पुष्पकुमार शाहीले प्रदेश सभापतिमा उमेदवारी घोषणा गरिसकेका छन्।
लगातार दुई कार्यकालदेखि कांग्रेस कैलालीको सभापति रहेका नरनारायण शाह र कैलालीकै लम्कीका हिमबहादुर रावलले पनि प्रदेश सभापतिमा उमेदवारी घोषणा गरेका छन् । तर सभापतिमा देउवा र पौडेल पक्षको साझा उमेदवारको खोजी भइरहेको छ ।
डोटीका कांग्रेस नेता वीरबहादुर बलायरलाई प्रदेश सभापतिमा साझा उम्मेदवारका रुपमा अगाडि बढाउने तयारी भइरहेको कांग्रेस स्रोतले जनाएको छ । शुक्रबार मनोनयन र शनिबार निर्वाचन हुने कार्यतालिका रहेको छ । प्रदेश अधिवेशनमा कानुनमन्त्री दिलेन्द्र बडु, पूर्वमन्त्रीहरु द्वय रमेश लेखक, एनपी साउद र वीरबहादुर बलायरसहितका नेताहरुको सहभागिता रहेको छ।