कांग्रेस लुम्बिनी सभापतिमा पौडेल समूहका अमरसिंह पुन विजयी

बुटबल : नेपाली कांग्रेस लुम्बिनी प्रदेशको सभापतिमा संस्थापन इतर पक्षका अमरसिंह पुन विजयी भएका छन् । संस्थापन पक्षका उम्मेदवार भरत शाहलाई पराजित गर्दै पुन सभापतिमा निर्वाचित भएका हुन् ।उनले ८ सय ८२ मत प्राप्त गरे । त्यस्तै संस्थापनका शाहले ७ सय ६७ मत पाएका छन् । रोल्पा जिल्लाका पूर्वसभापति समेत रहेका पुनले सङ्घीय सांसद समेत रहेका रुपन्देहीका भरत शाहलाई ८५ मतले पराजित गर्दै सभापतिमा विजयी भएका हुन् ।

एकजना उपसभापति राजु खनाल मात्र संस्थापन पक्षबाट विजयी भएका छन् । अरु सबै पदाधीकारीमा पुन प्यानलले जितेको हो । उपसभापतिमा गुल्मीका भुवनप्रसाद श्रेष्ठले ८ सय ४७ र दाङका राजु खनालले ७ सय ९२ मत प्राप्त गरी विजयी भएका छन् । खनालसँग पुन समूहका रुपन्देहीका अष्टभुजा पाठक पराजित भएका हुन्।

महामन्त्रीमा नवलपरासीका विक्रम खनाल ८ सय ४४ र कपिलवस्तुका सुरेन्द्रराज आचार्यले ८ सय ३९ मत ल्याएर विजयी भएका छन् । सहमहामन्त्रीमा अर्घाखाँचीका विष्णु खनाल मुस्कान ८ सय ५९ र दाङका खगराज पाण्डे ७ सय ७६ मत ल्याएर निर्वाचित भएका छन् ।

सहमहामन्त्री महिलातर्फ प्युठानकी निमा गिरी ८ सय ३० मत प्राप्त गरी विजयी भएकी छन् । विजयी ८ जना पदाधिकारीमध्ये एकजना उपसभापति राजु खनालबाहेक सबै अमरसिंह पुनले नेतृत्व गरेको संस्थापन इतर समूहको प्यानलका उम्मेदवार हुन् । शनिबार भएको चुनावमा १ हजार ६ सय ३१ मत खसेको थियो ।

विजयी भएका पुन कांग्रेस रोल्पाका निवर्तमान सभापति हुन् । पुन कांग्रेसका केन्द्रीय नेता दीपक गिरी, चन्द्र भण्डारी, संजय गौतम लगायतका नेताहरुको समर्थनमा अगाडि बढेका थिए । देउवा समूहबाट रुपन्देहीका प्रभावशाली मानिएका शाह प्रतिनिधिसभामा सार्वजनिक लेखा समितिका सभापति हुन् । उनलाई कांग्रेस नेता तथा गृहमन्त्री बालकृष्ण खाँण, केन्द्रीय सदस्य पुस्पा भुसाल, मानबहादुर विक, देवेन्द्रराज कंडेललगायतका नेताको साथ थियो ।

तर, निर्वाचनमा उनी पराजित रहे । नेता डा.चन्द्र भण्डारी सामाजिक सञ्जालमा लेख्छन्-‘परिवर्तनका सन्देश बाहक गुरु धिमिरे र अष्टभुजा पाठकको मत परिणामबाट रुपान्तरणकारीहरु माथि चुनौती थपिएको छ । नेपालजस्तो देशमा राजनीति विचार र इमान्दारिताबाट मात्र चल्दैन । समय छ।'