भैरहवा : पश्चिम तराईमा चिसो ह्वात्तै बढेको छ । हुस्सु-कुहिरो लागेसँगै चिसो बढेको हो । भैरहवास्थित गौतम बुद्ध विमानस्थलको जल तथा मौसम मापन केन्द्रका अनुसार भैरहवाको बिहानको न्यूनतम तापक्रम ७ दशमलव ४ डिग्री सेल्सियस मापन गरिएको छ ।
यो यस वर्षकै अहिलेसम्म सर्वाधिक न्यूनतम तापक्रम मापन गरिएको छ । त्यस्तै शनिबार भैरहवाको न्यूनतम तापक्रम ९ दशमलव ८ डिग्री सेल्सियस मापन गरिएको थियो । चिसो बढेसँगै सर्वसाधरणहरु सडक, चोकहरुमा आगोको सहारा लिन थालेका छन् । चिसोले जाडोयामका कपडाहरुको व्यापार समेत बढेको छ ।
यस्तै, आइतबार बिहान धनगढीको न्यूनतम तापक्रम ६ दशमलव ८ डिग्री सेल्सियस, नेपालगंजको ८ दशमलव शून्य, सिमराको ९ दशमलव शून्य, जनकपुरको ७ दशमलव ५ र विराटनगरको ९ दशमलव शून्य मापन गरिएको जल तथा मौसम विज्ञान विभागको मौसम पूर्वानुमान महाशाखाले जनाएको छ ।
देशभर चिसो बढ्ने क्रममा रहेकाले चिसोबाट जोगिन आवश्यक सुरक्षा र सतर्कता अपनाउन महाशाखाले अनुरोध गरेको छ ।
प्रतिक्रिया दिनुहोस !
