सिमानामा पर्खाल लगाउन ट्रम्प प्रशासनले दिएका सामग्रीमा लाग्यो खिया
वासिङटन : अमेरिकी पूर्वराष्ट्रपति डोनाल्ड ट्रम्पको सिमानामा विशाल पर्खाल बनाउने प्रतिबद्धताको हिस्सा बनेका फलामे सामग्रीमा खिया लागेको छ । मेक्सिको र अमेरिकाको सिमानामा विशाल पर्खाल बनाउने भन्ने ट्रम्पको प्रतिबद्धताको हिस्सा बनेका अर्बौ डलर बराबरको फलामे सामग्रीमा खिया लागेको हो ।
ट्रम्पले मेक्सिको हुँदै अवैधरुपमा अमेरिका प्रवेश गर्ने आप्रवासी रोक्न मेक्सिको र अमेरिकाको सिमानामा विशाल पर्खाल निर्माण गर्ने प्रतिवद्धताका साथ परियोजना अघि सारेका थिए । सो परियोजनाको हिस्सा बनेका कम्तीमा सवा एक अर्ब डलर रकम बराबरको स्टिल र अन्य फलामे सामग्रीमा खिया लागेको दी एटलान्टिकमा समाचार छ । सो समाचारअनुसार करिब १८ देखि ३३ फिट उचाई भएका ति सामग्री निर्माण कार्य अघि नबढ्दा खिया लागेका हुन् ।
ट्रम्पको कार्यकालमा ति सामग्री अमेरिकी रक्षा विभागले आफ्नो स्वामित्वमा लिएको थियो । तर ट्रम्पको कार्यकाल समाप्तीसँगै सिमानामा विशाल पर्खाल लगाउने ट्रम्पको बाचा तुहिएको र विभागले खरिद गरेका सामग्रीमा खिया लागेको बताइएको छ ।
यता वर्तमान अमेरिकी राष्ट्रपति जो बाइडेनले आफ्नो कार्यकाल सुरु भएदेखि ट्रम्प प्रशासनले बनाएका सबै नीति खारेज गर्ने बताउँदै आएका छन् । सन् २०१६ को राष्ट्रपतिय चुनावमा ट्रम्पले मेक्सिको र अमेरिकाको सिमानामा विशाल पर्खाल निर्माण गर्ने मुख्य नारा बनाएका थिए ।
सो नारासँगै ट्रम्पले सिमानामा विशाल पर्खाल निर्माण परियोजनामा हस्ताक्षर गरेका थिए । सो हस्ताक्षरपछि सयौ माइल क्षेत्रफलसम्म पर्खाल निर्माण कार्यअघि बढेको थियो ।