काठमाडौं : बागमती प्रदेशका खानेपानी, उर्जा तथा सिँचाई मन्त्री बसन्त मानन्धरले सहकारीमार्फत उत्पादनमा जान जोड दिएका छन् । शुक्रपथ बहुउद्देश्यीय सहकारी संस्थाको ११औं वार्षिक साधारणसभाका अवसरमा बोल्दै मन्त्री मानन्धरले कृषिमा यान्त्रिकरण भित्रयाएर उद्यमशीलता बढाउन जोड दिए । कृषि उत्पादन बढाउन प्रदेश सरकारले सिँचाइ व्यवस्था गर्न लागेको उनले बताए । सहकारीमार्फत रोजगारी सिर्जना र उत्पादन बढाउन जोड दिनुपर्ने उनको भनाइ छ ।
राष्ट्रिय सहकारी महासंघका सञ्चालक टेकप्रसाद चौलागाईले सहकारीलाई उत्पादनमा जान ४७ वटा ऐन बाधक रहेको बताए । सहकारीले विद्युत उत्पादन गर्न, स्कुल सञ्चालन गर्न चाहन्छु’ उनले भने,‘तर ऐनले सहकारी नचिन्दा काम गर्न गाह्रो छ ।’ सहकारीमा लागेर सदस्यको आर्थिक उन्नती कति भयो भन्ने विषय मुख्य रहेको उनले बताए ।
सिभिल सहकारी जोगाउन प्रयास गरिए त्यसको नेतृत्वसँग बारम्बार छलफल गर्दा पनि गम्भीर नभएको बताए । ‘निदाएको अभिनय गर्नेलाई उठाउन सकिदैन’ उनले भने । संस्थाबारे सदस्यले बारम्बार जानकारी लिने गरेमा सहकारी समस्या नपर्ने उनले बताए ।
काठमाडौं महानगरपालिका-१४ का अध्यक्ष शोभा सापकोटाले २ वटा सहकारीको बदमासीले सिंगो सहकारी बदनाम हुन नहुने बताइन् । ‘पलायन भइरहेका दक्ष जनशक्तिलार्ई सहकारीले रोक्नुपर्छ’ उनले भनिन् ।
राष्ट्रिय सहकारी बैंकका सञ्चालक तथा काठमाडौं जिल्ला सहकारी संघका अध्यक्ष ज्ञानबहादुर तामाङले सहकारीले रोजगारी र उद्यमशीलतामा जोड दिनुपर्ने बताए । केन्द्रीय बहुउद्देश्यीय सहकारी संघका महासचिव माधव तिमल्सिनाले बहुउद्देश्यीय सहकारीले बहुआयामिक परियोजना सञ्चालन गर्नुपर्ने बताए । सहकारी ऐनमा कुन पुँजीबाट ७०/३० को कारोबार गर्ने भन्ने स्पष्ट व्यवस्था नभएकाले सहकारीले काम गर्न नसकेको उनले बताए ।
प्रतिक्रिया दिनुहोस !
