यी हुन् २०२१ का सबैभन्दा महंगा ५ प्राकृतिक प्रकोप
लण्डन : यो वर्ष अर्थात् सन् २०२१ मा विश्व कोभिड-१९ महामारीको चपेटामा मात्र नभई प्राकृतिक प्रकोपको चपेटामा पनि पर्यो । संसारभर बाढी, पहिरो, आँधी, तुफान, ज्वालामुखी र डढेलो आदि जस्ता प्राकृतिक प्रकोपले यस वर्ष झन ठूलो विनाश ल्यायो ।
प्राकृतिक प्रकोपका कारण हुने क्षती गत वर्षको तुलनामा यसवर्ष १३ प्रतिशतले बृद्धि भएको बेलायती प्राकृतिक सहायता समूहले पत्ता लगाएका छन् । ब्रिटिस एडका अनुसार जलवायु परिवर्तनका कारण प्रतिकुल बनेको मौसमले यस वर्ष संसारभर १सय७० बिलियन डलरभन्दा बढिको भौतिक क्षती पुग्यो । प्राकृतिक प्रकोपका कारण सन् २०२० को तुलनामा यसवर्ष २० बिलियन डलरभन्दा बढि क्षती पुगेको सो समूहले जनाएको छ । यस्तै क्रिस्चियन एडका अनुसार मानवनिर्मित जलवायु परिवर्तनले यसवर्ष संसारभर कम्तीमा ११ सय मानिसले ज्यान गुमाएका छन् भने करिब १ करोड ३० लाख मानिस विस्थापित भएका छन् ।
यस्तै विभिन्न सरकारी एवम् गैरसरकारी संस्थाले विभिन्न तथ्यांकको आधारमा यस वर्षका सबैभन्दा महंगा एवम् विनाशकारी प्राकृतिक प्रकोपलाई सूचीमा राखेका छन् ।
१. हुरिकेन ईदा
अगष्ट अन्तिममा विनाशकारी आँधी हुरिकेन ईदाले क्यारेवियन क्षेत्र, अमेरिकाको लुइजिनिया र आसपासको क्षेत्रमा ठूलो क्षती पुर्यायो । सो आँधीपछि तहसनहस परेका क्षेत्रमा करिब ६५ बिलियन डलर बराबरको भौतिक क्षती पुगेको आँकलन गरिएको छ ।
२. युरोपियन बाढी
गएको जुलाईमा भारी वर्षापछि युरोपका विभिन्न मुलुकमा बाढीले तहल्का मच्चायो । जर्मनी, फ्रान्स, नेदरल्याण्डस, बेल्जियम र लक्जेमबर्ग आदी मुलुक सो बाढीबाट सबैभन्दा बढि प्रभावित बने । करिब २सय४२ मानिसको ज्यान लिएको सो बाढीले त्यस क्षेत्रमा करिब ३३ बिलियन युरोभन्दा बढि मूल्य बराबरको भौतिक क्षती पुर्यायो ।
३. टेक्सास, हिम आँधी
गत फेब्रुअरीमा महिनामा अमेरिकी राज्य टेक्सासमा हिमआँधीले ठूलो विनाश पुर्यायो । सो आँधीपछि टेक्सासमा लामोसमयसम्म विद्युत् अवरुद्ध बन्यो । २० वर्षमा पहिलोपटक स्थानियवासीले अन्धकारमा बस्नुपर्यो भने त्यहाँको बाह्य तापक्रम माइनस ११ डिग्रि सेल्सियसमा झर्यो । सो आँधीका कारण करिब २४ बिलियन डलरभन्दा बढि रकम बराबरको बीमामा क्षती पुग्यो ।
४. हेनान बाढी
मध्य जुलाईमा चीनको हेनान प्रान्तमा आएको बाढीले करिब ८ लाखभन्दा बढि स्थानिय बासिन्दाको उठिबास बनायो भने करिब १ करोड ४० लाख स्थानीय मानिस प्रभावित बने । सो बाढीले ३ सयभन्दा बढि मानिसको ज्यान लियो भने सो क्षेत्रमा करिब १७.६ बिलियन डलर रकम बराबरको भौतिक क्षती पुग्यो ।
५. ब्रिटिस कोलम्बिया बाढी
पश्चिमी क्यानडेली क्षेत्र ब्रिटिस कोलम्बियामा नोभेम्बरमा आएको बाढीले करिब ५.६ बिलियन पाउण्ड बराबरको भौतिक क्षती पुग्यो ।
माथिको सूची बीमा दाबी गरिएका विकसित मुलुकहरुले बेहोर्नुपरेको क्षती मात्र उल्लेख गरिएपनि विकासोन्मुख मुलुकहरुमा प्राकृतिक प्रकोपले झन ठूलो क्षती पुगेको रिपोर्टले देखाएको छ ।
यसै वर्ष दक्षिण सुडानमा आएको बाढीले करिब ८ लाख भन्दा बढि मानिस घरबार विहिन बनेका छन् । यस्तै अक्टोबर महिनादेखि डिसेम्बर अन्तिमसम्म बंगलादेश र भारतमा आएको आँधी तुफान, फिलिपिन्समा गएको बाढी आदिबाट संसारभर २सय५० विलियन डलर बराबरको क्षती भएको अनुमान गरिएको छ ।