बेनी : म्याग्दीका हिमाली बस्तीमा बुधबार बिहानदेखि भएको हिमपातसँगै बढेको चिसोले जनजीवन प्रभावित भएको छ। म्याग्दीको धवलागिरी गाउँपालिका–१ गुर्जा, अन्नपूर्ण गाउँपालिका–६ को पर्यटकीय बस्ती घोडेपानी र वडा नम्बर ८ को राम्चेमा हिउँ परेको हो।
बुधबार बिहान ४ बजेदेखि हिमपात सुरु भएको घोडेपानी टोल विकास संस्थाका अध्यक्ष बिरेन गर्बुजा पुनले बताए। उनका अनुसार चार फिट बाक्लो हिउँ जमेको छ। हिउँ र पानी पर्ने क्रम जारी छ।
म्याग्दीमा यो सिजनमा पहिलो पटक हिमपात भएको हो। खोला, ताल, पधेरा र धारामा पानी जमेको छ। सर्बसाधारण घरभित्रै आगो तापेर बसेका छन्। स्याउ, जौ, उवा, फापर बालीलाई बर्षात र हिउँले सिचाईमा सहयोग पुग्ने कृषि ज्ञान केन्द्र म्याग्दीका कृषि प्रसार अधिकृत गोबिन्द पाण्डेले बताए।
याकचौरी, भेडाच्याङ्ग्रा र घोडा खच्चड लगायत पशुचौपायालाई गोठमै बाधेर राखेका छन्। कृषकरुले चरणका लागि लेकाली क्षेत्रमा लगेका पशु गोठ बेशी झारेका छन्। बर्खामा हिमालको फेदीका बुकी र चरन खर्कमा लगिएका गाई, भैसी, चौरी, भेडा, बाख्राको गोठ चिसो बढेसँगै गाउँ बस्ती आसपासका जंगल र पाखामा झारेका छन्। 
_20211229033940.jpg)
प्रतिक्रिया दिनुहोस !
