जनकपुरधाम : डा. सीके राउत नेतृत्वको जनमत पार्टीले चलाएको किसान आन्दोलनका क्रममा प्रहरी र प्रदर्शनकारीबीच झडप भएको छ । झडपमा चार आन्दोलनकारी र चार प्रहरी जवान घाइते भएका छन् । पूर्वपश्चिम राजमार्ग अवरुद्ध गरेर आन्दोलन गरिरहेका कार्यकर्तामाथि प्रहरीले ११ राउण्ड रबरको गोली चलाएको हो ।
धनुषाको गणेशमान चारनाथ नगरपालिकाको पोर्ताहामा आन्दोलनकारी राजमार्ग अवरुद्ध गरेपछि त्यसलाई खुलाउने क्रममा प्रहरी र जनमत पार्टीका कार्यकर्ता बीच झडप भएको हो ।
धनुषाका प्रहरी प्रवक्ता प्रहर्री नायव उपरिक्षक (डीएसपी) दीपेन्द्र बस्नेतका अनुसार स्थिति नियन्त्रणमा लिन ११ राउण्ड रबर बुलेट, १६ सेल अश्रुग्यास प्रहार गरिएको थियो । गोली चलेपछि आन्दोलनकारीहरु तितरवितर भएका छन् ।
जिल्ला प्रहरी कार्यालय धनुषाका प्रहरी प्रवक्ता प्रहरी नायव उपरीक्षक बस्नेतले प्रदर्शनकारीको तर्फबाट ढुंगामुढा हुन थालेपछि जवाफमा प्रहरीको तर्फबाट अश्रुग्यास प्रहार भएको बताए । आन्दोलनकारीको ढुंगामुडाबाट २ जना प्रहरी र २ जना सशस्त्र प्रहरी पनि घाइते भएका छन् ।
यद्यपी प्रदर्शकारीका अनुसार झडपको क्रममा प्रहरीले गोली चलाउँदा ४ जना प्रदर्शनकारी घाइते भएको बताएका हुन् । झडप अहिले पनि जारी नै रहेकाले राज्यमार्ग खोलाउने प्रयास भइरहेको प्रहरीले जनाएको छ । अहिले त्यहाँ नेपाल प्रहरीका साथै सशस्त्र प्रहरीलाई समेत परिचालन गरिएको छ ।
जनमत पार्टीले किसान आन्दोलनको नाउँमा राज्यमार्गहरु अनिश्चितकालका लागि बन्द गरेको छ ।
प्रतिक्रिया दिनुहोस !
