पोखरा : राष्ट्रिय सभा सदस्यका लागि नेपाली कांग्रेससहित सत्ता गठबन्धनका उम्मेदवारले मनोनयन दर्ता गरेका छन् । कांग्रेसकी नेत्री कमला पन्त, माओवादीका भुवन सुनार र सुरेश आलेमगरले पोखरास्थित निर्वाचन अधिकृतको कार्यालयमा मंगलबार अपरान्ह मनोनयन दर्ता गराएका हुन् । महिलामा पन्त, दलितमा सुनार र खुलामा आलेमगरको उम्मेदवारी परेको हो ।
राष्ट्रिय सभा निर्वाचनका लागि सत्ता गठबन्धनका नेपाली कांग्रेस, माओवादी लगायत दलहरुले गठबन्धन गरेका छन् । एमाले भने एक्लै मैदानमा छ । गण्डकीबाट ३ जना निर्वाचित हुनेमा माओवादीबाट २ र कांग्रेसले १ जनालाई उम्मेदवार बनाउने सहमति सत्ता गठबन्धनबीच भएको हो । भागबन्डामा नेकपा समाजवादीलाई गण्डकीमा उम्मेदवार परेको छैन । राष्ट्रिय सभाको निर्वाचन आउँदो माघ १२ गते हुँदैछ ।
यसअघि गण्डकीबाट निर्वाचित माओवादीका दिननाथ शर्मा र खिमबहादुर विक तथा नेकपा एसकी शान्तिकुमारी अधिकारीको राष्ट्रिय सभाको सदस्यको पदावधि सकिँदैछ । उनीहरुसहित १९ जनाको पदावधि सकिँदैछ ।
मंगलबार नै एमालेका उम्मेदवारहरु पुण्यप्रसाद पौडेल, अर्जुन सुनाम र लीला थनेतले क्रमशः खुला, दलित र महिला क्लस्टरबाट उम्मेदवारी दर्ता गराएका छन् । राष्ट्रिय सभा चुनावका लागि प्रदेशसभा सदस्य, नगरपालिका प्रमुख र उपप्रमुख तथा गाउँपालिका अध्यक्ष र उपाध्यक्ष मतदाता हुन्छन् ।
गण्डकी प्रदेशमा ६० प्रदेशसभा सदस्य छन् । एमाले २७, कांग्रेस १५, माओवादी १२, जसपा २, जनमोर्चा २ र स्वतन्त्र १ छन् ।
प्रतिक्रिया दिनुहोस !
