भियना: अष्ट्रियाको सत्तारुढ सरकारले कोभिड १९ विरुद्धको खोप लगाउन प्रोत्साहन स्वरुप राष्ट्रिय चिठ्ठा प्रणाली लागु गर्ने घोषणा गरेको छ । सरकारले बिहीबार सो घोषणा गरेको हो । चिठ्ठा प्रणालीअन्र्तगत खोप लगाउने नागरिकले पुरस्कार स्वरुप सानो देखि ठुलो रकम प्राप्त गर्ने त्यहाँका चान्सलर कार्ल नेहम्मेरले अन्र्तराष्ट्रिय मिडियासँग बताएका छन् ।
खोप लगाउने नागरिकले कुपन प्राप्त गर्ने छन् भने हरेक कुपनमार्फत ५ सय युरो जित्नेछन् । खोप चिठ्ठा उपलब्ध गराउँदा नागरिकहरु खोप लगाउन प्रोत्साहित हुने अपेक्षा गरिएको छ । खोप नलगाउनेलाई भने ६ सय युरो जरिवाना गराइने बताइएको छ । सो नियम बिहिबार संसदले पारित गर्ने र केहि दिनभित्रमा लागु गरिने बताइएको छ ।
पश्चि युरोपेली मुलुक अष्ट्रिया कोभिड १९ विरुद्ध सबैभन्दा कम खोप लगाउने मुलुकमा गनिन्छ । अष्ट्रियाका ७२ प्रतिशत मानिसले मात्र कोभिड १९ विरुद्ध पुर्ण खोप लगाएका छन् । त्यहाँ ओमिक्रोन भेरियन्ट तिब्र रुपमा फैलिइरहेको छ भने सरकारले कोभिड नियन्त्रणका लागि लकडाउन नलगाउने बताइएको छ ।
चीन, रुस र इरानले हिन्द महासागरमा संयुक्त सैन्य अभ्यास गर्दै
दुबई चीन, रुस र इरानका नौसेनाले संयुक्त रुपमा सैन्य अभ्यास गर्ने भएका छन् । तीनै मुलुकका नौसेनाले शुक्रबार संयुक्त अभ्यास गर्ने भएका हुन् । इरानको सैन्य बलले अर्ध सरकारी मिडिया आइएसएनएमार्फत बिहिबार सो जानकारी दिएको हो ।
‘२०२२ मेरिन सेक्युरिटी बेल्ट’ नाम दिइएको तिनवटै मुलुकको सो संयुक्त सैन्य अभ्यास हिन्द महासागरको उत्तरी क्षेत्रमा हुने बताइएको छ । तीन देशका नौसेनाविच हुन लागेको सो संयुक्त अभ्यास तेस्रो पटक हो । सो सैन्य अभ्यास आगामी चार दिनसम्म चल्ने बताइएको छ ।
बेलायतले कोभिड १९ प्रतिबन्ध हटायो
लण्डन बेलायत सरकारले कोभिड १९ विरुद्ध लगाएको प्रतिबन्ध हटाएको छ । सरकारले बिहिबारदेखि लागु हुने गरी कोभिड १९ प्रतिबन्ध हटाएको हो । बेलायतका प्रधानमन्त्री बोदरिस जोनसनले सो जानकारी दिएका हुन् । कोभिड १९ को नयाँ भेरियन्ट ओमिक्रोनले देशभर चरम अवस्था पार गरिसकेका कारण सरकारले सो प्रतिबन्ध हटाउने निर्णय गरेको प्रधानमन्त्रीले बताएका छन् ।
सो निर्णयसँगै वर्क फ्रम होम र विद्यार्थीले कक्षा कोठामा अनिवार्य मास्क लगाउनु पर्ने लगायत नियम हटेको स्काई न्युजमा खबर छ । आगामी बिहिबारदेखि लागु हुने गरी सार्बजनिक स्थानमा मास्क लगाउनु पर्ने र साना ठुला सार्बजनिक कार्यक्रममाथि लागेको प्रतिबन्धसमेत हट्ने बताइएको छ । बेलायत सरकारले गएको डिसेम्बरदेखि कोभिड १९ विरुद्ध नयाँ प्रतिबन्ध लागु गरेको थियो ।
सन् २०२१ मा ५.५ बिलियन युरोको फ्रान्सेली स्याम्पेन बिक्री
पेरिस गत वर्ष अर्थात् सन् २०२१ मा मात्र करिब ५.५ बिलियन युरो बराबरको फ्रान्सेली स्याम्पेन बिक्रि भएको छ । कोभिड १९ महामारीको प्रतिबन्धका बाबजुद गत वर्ष सो रकम बराबरको मदिराको प्रकार फ्रान्सेली स्याम्पेन बिक्रि भएको हो ।
स्याम्पेन निर्माता कम्पनीका अनुसार सन् २०२१ म करिब ३३२ मिलियन बोतल स्याम्पेन बिक्रि भएको थियो । जुन अघिल्लो वर्षको तुलनामा ३२ प्रतिशत बढिले बिक्रि भएको हो । कोभिड लकडाउनका बाबजुदसमेत विश्वभर २० प्रतिशत बढि फ्रान्सेली स्याम्पेन बिक्रि भएको त्यहाँको स्याम्पेन व्यापार संगठनले जनाएको छ ।
‘लकडाउन र कोभिड प्रतिबन्धको समयमा स्याम्पेनमार्फत घरमै कोरोना उपचार गर्ने र परिवारभित्रै रमाइलो गर्ने उदेश्यले ग्राहकको माग बढेको थियो । सोहि कारण गत वर्ष ठुलो मात्रामा स्याम्पेनको माग र बिक्रि बढेको हुन सक्छ’ सो संगठनले स्थानिय मिडियासँग भनेको छ ।
रुसले युक्रेनमाथि हमला गर्ने बाइडेनको अनुमान
वासिङटन: अमेरिकी राष्ट्रपति जो बाइडेनले रुसले युक्रेनमाथि हमला गर्ने अनुमान गरेका छन् । रुसले युक्रेनको छिमेकी मुलुक बेलारुसमा सैन्य अभ्यासका लागि आफ्ना सैनिक तैनाथ गरेपछि बाइडेनले सो अनुमान गरेका हुन् । ‘सैन्य अभ्यासको नाममा रुसको सैन्य बल युक्रनेको सीमा नजिकै बेलारुस पुगिसकेको छ । त्यसैले मलाई लाग्छ, रुसले पक्का युक्रेनमाथि घातक आक्रमण गर्नेछ’ ह्वाइट हाउसस्थित रिपोटरहरुसँग बाइडेनले भनेका छन् ।
यदि युक्रेनमाथि हमला गरेमा रुसले त्यसको गहिरो मुल्य चुकाउनुपर्ने चेतावनी समेत बाइडेनले दिएका छन् । युक्रेन सम्बन्धमा तनाव बढ्दै गएपछि सहयोगी मुलुकसँग बार्ताका लागि अमेरिकी विदेश सचिव एन्टोनी ब्लिंकन बिहिबार जर्मनको राजधानी बर्लिन पुगेका छन् ।
चर्चमा भागदौड मच्चिदा २९ धर्मावलम्बीको मृत्यु
मोन्रोभिया: पश्चिम अफ्रिकी मुलुक लाइबेरियाको एक चर्चमा भागदौड मच्चिदाँ कम्तीमा २९ क्रिष्चियन धर्मावलम्बीको मृत्यु भएको छ । लाइबेरियाको राजधानी मोन्रोभियास्थित चर्चमा बुधबार राती भागदौड मच्चिदाँ कम्तीमा २९ धर्मावलम्बीको मृत्यु भएको हो ।
लाएबेरियाका सुचना मन्त्री जलवाह तोन्पोले बिहिबार सो जानकारी दिएका हुन् । सुचना मन्त्रीका अनुसार सो घटना राजधानीस्थित न्यु क्रु टाउनमा भएको हो । क्रिस्चियनहरुको पुजा कार्यक्रममा रातभर भागदौड मच्चिदाँ २९ क्रिस्चियन धर्मावलम्बीको ज्यान गएको हो । यद्यपि, घटनाको कारणबारे भने हालसम्म पुष्टि भइनसकेको अन्र्तराष्ट्रिय मिडियामा खबर छ । त्यहाँका अधिकारीहरु बिहिबार साँझ घटनास्थलमा पुग्ने बताइएको छ ।
ज्वालामुखी विस्फोटका कारण १० हजार किलोमिटर टाढाको तेल चुहिँदा क्षतिपूर्ति माग
लिमा: टोङ्गा ज्वालामुखी विस्फोटका कारण करिब १० हजार किलोमिटर टाढा रहेको दक्षिण अमेरिकी मुलुक पेरुमा एउटा ट्यांकरबाट तेल चुहिएको छ । ज्वालामुखी विस्फोटपछि समुद्रमा अस्वभाविक रुपमा आएको छालले एक ट्यांकरबाट पेरुको समुद्रमा कच्चा पेट्रोलियम तेल चुहिएको हो ।
ज्वालामुखी विस्फोटका कारण आफ्नो समुद्रमा तेल चुहिएको पेरुको पछिल्लो इतिहासकै सबैभन्दा नराम्रो पर्यावरणीय विपद् भन्दै पेरुले त्यसको क्षतीपुर्ती माग गरेको छ । पेरुका प्रधानमन्त्री र त्यहाँको विदेश मन्त्रालयले तेल चुहिँदा आफ्नो सामुद्रीक र बाह्य वातावरण विगारेको स्पेनको सबैभन्दा ठुलो तेल सेवा रेस्पोलसमक्ष क्षतीपुर्ती माग गरेको हो ।
ला पाम्पिया प्रशोधन केन्द्रमा रहेको कच्चा तेल सार्ने क्रममा ज्वालामुखीको धक्काले ट्यांकर हल्लिदा करिब ६ हजार ब्यारेल तेल समुद्रमा चुहिएको बताइएको छ । जसका कारण त्यहाँको समुद्र र तटिय क्षेत्रको वातावरण विगारेको बताइएको छ । सो तेल चुहिएपछि समुद्र र वरिपरिको क्षेत्र सफा गर्न आफुले ठुलो संख्यामा जनशक्ति परिचालन गरेको रेस्पोलले जनाएको छ ।
गएको शनिबार प्रशान्त महासागरस्थित ‘हुङ्गा टोङ्गा हुङ्गा हा’ आपाई ज्वालामुखी विस्फोटन भएको थियो । सो ज्वालामुखी विस्फोटको असर संसारभर परेको थियो । ज्वालामुखी विस्फोटपछि प्रभावित टोङ्गामा बिहिबार न्युजिल्याण्डबाट खानेपानी बोकेर पहिलो विदेशी सहायताको विमान पुगेको छ ।
जेलभित्रै दर्जनौं महिला कैदीलाई बलात्कारको आरोपमा १५ वर्ष जेल
किन्सासाः जेलभित्र दर्जनौ महिला कैदीलाई बलात्कार गरेको आरोपमा आरोपित कैदीलाई १५ वर्ष जेल सजाय सुनाएको छ । कंगोको अदालतले ५६ महिला कैदीलाई जेलभित्रै बलात्कार गरेको आरोपमा सो सजाय सुनाएको हो ।
सन् २०२० सेप्टेम्बरमा कंगोको राजधानी किन्सासास्थित कसापा कारागारभित्र दंगा भएको थियो । सो समयमा १० कैदिमार्फत तिन दिनमा ५६ महिला कैदी बलात्कृत भएका थिए । ति महिलामाथि निरन्तर रुपमा बलात्कार भएको थियो । बलात्कारपछि तीन महिला एचआइभी संक्रमित बनेका थिए भने जसमध्ये १६ महिला कैदी गर्भवती बनेका थिए । आरोपित कैदीलाई अदालतले दोषी ठहर गर्दै १५ वर्षको जेल सजाय सुनाएको हो । दोषी ठहर भएका हरेक आरोपित कैदीले प्रत्येक पिडित महिलालाई ५ हजार डलर जरिवानाको सजायसमेत सुनाएको छ ।
तालिवानको शासनपछि ५ लाख बढीले गुमाए जागिर
काबुल: अफगानिस्तानमा तालिवानको नयाँ सरकार बनेपछि त्यहाँका ५ लाख भन्दा बढि मानिसले आफ्नो जागिर गुमाएका छन् । संयुक्त राष्ट्र संघको अन्र्तराष्ट्रिय श्रम संगठन (आइएलओ)का अनुसार त्यहाँका ५ लाख भन्दाबढि मानिसले आफ्नो जागिर गुमाएका हुन् ।
तालिवानले गएको अगष्टमा अफगानिस्तान कब्जामा लिएको थियो । अफगानिस्तान कब्जामा लिएको करिब १ महिनापछि तालिवानले आफ्नो सरकार गठन गरेको थियो । त्यसयता तालिवानले अधिकांशलाई जागिरबाट निकालेको र कतियले जागिर छोड्नुपरेको ५ लाख बढि मानिसले आइएलओले जनाएको छ ।
बिहिबार अफगानिस्तानका उद्योगपतिहरुले अन्र्तराष्ट्रिय समुदायसँग अफगान फन्ड सार्बजनिक गर्न आग्रह समेत गरेका छन् । यदि अफगान फन्ड सार्बजनिक नगरिएमा त्यहाँका १५ लाखभन्दा बढि मानिस बेरोजगार हुने चेतावनीसमेत दिएका छन् ।
प्रतिक्रिया दिनुहोस !
