काठमाडौं : नेपाल आइडल–४ गाला राउन्डमा प्रवेशसँगै थप प्रतिस्पर्धात्मक बनेको छ। आइडलको भब्य मञ्चमा बिहीबार उत्कृष्ट ११ मध्ये पाँच जनाले आ–आफ्नो प्रस्तुति दिएका थिए।
कार्यक्रमको सुरुमै ‘यी हल्लाहरू हुन तिमीले सुनेका’ भन्दै विश्वास जित्ने कोसिस गर्दै थिए, राजकुमार परियार। ‘मायालुलाई प्रतीक्षा गर’ भनेर अनुरोध गर्दै थिए, भूपेन्द थापामगर। सुरिलो स्वरमा ‘चिसो बतास’ बोलको गीत प्रस्तुत गरिन्, सुमिन पाख्रिनले।
‘जनम जनम जिउला सँगै’ बोलको गीतमा आफूलाई अब्बल प्रस्तुत गरे, सुरेश लामाले। प्रस्तुतिपछि उनले सबैको प्रशंसा कमाएका थिए। बिहीबारको कार्यक्रममा अन्तिम प्रस्तुति दिइन्, बेनिसा पौडेलले। उनले ‘फेरि आयो त्यो रात’ बोलको गीत गाइन्।
बिहीबार उत्कृष्ट १२ प्रतियोगीबाट एक प्रतियोगी बाहिरिएका छन्।‘बटम थ्री’मा सुरेश लामा, सुमिन पाख्रिन र संगीत पौडेल परेका थिए। कार्यक्रमको अन्तिममा अघिल्लो हप्ताको प्रस्तुतिबाट कम भोट ल्याउने संगीत पौडेल नेपाल आइडलको मञ्चबाट बाहिरिए।
अतिथि कलाकारका रुपमा कार्यक्रममा उपस्थित आनन्द कार्कीले आफ्ना केही चर्चित गीत प्रस्तुत गरेका थिए। चैतको पहिलो हप्ता नेपाल आइडल सिजन–४ को विजेता घोषणा हुनेछ।
प्रतिक्रिया दिनुहोस !
