पोखरा: राष्ट्रिय सभा सदस्यका लागि बुधबार भएको निर्वाचनमा आफ्ना उम्मेदवारलाई भएभन्दा कम मतभार आउनु गम्भीर कमजोरी भएको सत्ता गठबन्धनका साझेदार दलको निष्कर्ष छ । चुनावमा गठबन्धनका उम्मेदवारले गठबन्धनमा आवद्ध दलका मतदाताको मतभारभन्दा कम मत पाएका थिए ।
गण्डकी प्रदेश सभामा कांग्रेस नेतृत्वको सत्ता गठबन्धनका बहुमत अर्थात ३१ सांसद छन् । तर कांग्रेस उम्मेदवारलाई २९ र माओवादी उम्मेदवारलाई २९ र ३० सांसदको मात्रै मत आएको थियो । विपक्षी एमालेका २७ सांसद छन् । तर उनीहरुका उम्मेदवारलाई त्यसभन्दा बढी सांसदको मत आएको थियो ।
अन्तर्घात असफल नै भए पनि सत्ता गठबन्धनले उक्त निर्वाचन परिणाममाथि समीक्षा गरेको छ । गठबन्धन दलका नेताहरुले बिहीबार समीक्षा बैठकपछि विज्ञप्ति जारी गर्दै कम मत आउनु गम्भीर कमजोरी भएको स्वीकारेका छन् । ‘समीक्षाका सन्दर्भमा हाम्रो पक्षमा गम्भीर कमी, कमजोरी रहन गएको हुँदा आ–आफ्नो पार्टीमा छलफल गरी यसलाई अनुशासनको विषयवस्तु बनाउने पनि निर्णय भयो,’ विज्ञप्तिमा भनिएको छ ।
विज्ञप्तिमा कांग्रेस गण्डकी सभापति शुक्रराज शर्मा, माओवादी केन्द्र गण्डकी अध्यक्ष गायत्री गुरुङ, नेकपा एसका गण्डकी सचिव प्रतापलाल श्रेष्ठ, राष्ट्रिय जनमोर्चा गण्डकी अध्यक्ष शंकर बराल र जनता समाजवादी पार्टी गण्डकी उपाध्यक्ष हेमबहादुर थापाले हस्ताक्षर गरेका छन् ।
गठबन्धनका केही मतदाताले एमाले उम्मेदवार मत दिए पनि गण्डकीमा ३ जनै गठबन्धनका उम्मेदवारी विजयी भएका थिए । सुरेश आलेमगर, कमला पन्त, भुवनबहादुर सुनार गण्डकीबाट राष्ट्रिय सभा सदस्य चुनिएका छन् ।
बैठकले गठबन्धनको आवश्यकता र औचित्य रहेको भन्दै लोकतन्त्र र संविधानको रक्षाका लागि गठबन्धनलाई निरन्तरता दिनुपर्ने पनि निष्कर्ष पनि निकालेको छ । आफ्ना उम्मेदवारहरुलाई विजयी बनाउन लागेका नेता, कार्यकर्ता एवं मतदातालाई बैठकले धन्यवाद दिएको छ । नवनिर्वाचित सांसदहरुलाई बधाई ज्ञापन गर्दै लोकतन्त्र र संविधानको पक्षमा दृढतापूर्वक उभिन पनि बैठकले अनुरोध गरेको छ ।
गण्डकी प्रदेश सभामा कांग्रेससहितका गठबन्धनका ३१ सांसद छन् । गण्डकीमा ८५ स्थानीय तह छन् । प्रदेश सभामा एमाले सांसद संख्या २७ छ । तर कांग्रेसकी पन्त, माओवादीका सुनारलाई उनीहरुको पार्टीका गठबन्धनका प्रदेश सभाका ३१ मध्ये २ सांसदले मत हालेनन् । आलेलाई पनि १ मत कम आयो ।
पन्त र सुनारलाई प्रदेश सांसद २९ जनाको मात्रै मत परेको थियो । उनकी प्रतिस्पर्धी एमालेकी थनेतलाई आफ्नो पार्टीका २७ र बाँकी २ गरी २९ जना प्रदेश सांसदको मत आएको थियो । सुनामलाई पनि प्रदेश सांसद २९ जनाले मत हालेका थिए । अन्यतर्फको निर्वाचनमा एकजना प्रदेश सांसदको मत बदर भएको थियो । आलेमगरले भने ३० सांसदको मत पाए । एमालेका पुण्य पौडेललाई प्रदेश सभामा भएका २७ एमाले सांसदभन्दा १ बढी २८ जनाको मत आयो ।
माओवादीका आलेमगर र एमालेका पौडेललाई स्थानीय तहका तर्फबाट क्रमशः ९२ र ७५ जनाले मत हाले । यो निर्वाचनमा प्रदेश सांसदको ४८ र स्थानीय तह प्रमुख-उपप्रमुखको १८ मतभार हुन्छ । गण्डकीको प्रदेश सभामा ५९ सांसद छन् । ८५ स्थानीय तह छन् । कांग्रेसकी कमला पन्तलाई स्थानीय तहका प्रमुख, उपप्रमुख ९४ जनाको मत आएको निर्वाचन परिणामले देखाएको छ । उनकी प्रतिस्पर्धी लीला थनेतालाई ७४ जनाको मत परेको थियो । माओवादीका भुवन सुनारले स्थानीय तहका ९२ जनाको मत पाए भने एमालेका अर्जुन सुनामले ७४ जना स्थानीय तह प्रमुख उपप्रमुखबाट भोट पाए ।
निर्वाचनमा मुस्ताङको लोघेकर दामोदरकुण्ड गाउँपालिका प्रमुख राजु विष्ट र बागलुङ नगरपालिकाका उपप्रमुख सुरेन्द्र खड्का अनुपस्थित भएका थिए । विष्ट एमाले र खड्का राप्रपा हुन् ।
प्रतिक्रिया दिनुहोस !
