काठमाडौं : रेडियो अन्नपूर्ण नेपालको आयोजनामा भएको ‘रेडियोमा खेलौं दोहोरी’को विजेता विमला मगर बनेकी छन् । शनिबार भएको ग्रान्ड फिनालेमा माघ १५ देखि १७ गतेसम्म चलेको डिजिटल अडिसनबाट ६ जनाबीच प्रतिस्पर्धा भएको थियो । त्यसमध्ये विवेक पाण्डे र विमला मगर ग्रान्ड फिनालेका लागि छनोट भएका थिए ।
दुई जनाबीच भएको प्रतिस्पर्धाबाट विमला विजेता बनेकी हुन् । ग्रान्ड फिनालेमा चर्चित लोकदोहोरी गायिका देवी घर्तीमगर र गायक राजु ढकाल निर्णायक थिए । यसअघि तीन दिनसम्म चलेको डिजिटल अडिसनबाट विवेक पाण्डे, विमला मगर, श्रीराम दाहाल, सर्मिला अर्याल, सरू श्रेष्ठ र आशिष घर्तीमगर फाइनलका लागि छनोट भएका थिए । डिजिटल अडिसनमा पहिलो दिन कल्पना दाहाल र प्रदीप रोक्का, दोस्रो दिन राजेन्द्र भण्डारी र प्रतिमा अर्याल तथा तेस्रो दिन खुमन अधिकारी र रमिला न्यौपाने अतिथि निर्णायकका रुपमा उपस्थित भएका थिए ।
विजेता घोषित भएपछि विमलाले आफू पहिलो पटक दोहोरी प्रतियोगितामा प्रथम भएको बताउँदै रेडियो अन्नपूर्ण नेपाललाई धन्यवाद दिइन् । प्रतिभाहरू लुकेर बस्ने भएकाले अवसरको सदुपयोग गर्न पनि उनले आग्रह गरिन् । ‘म यहाँसम्म पुग्छु र प्रथम हुन्छु भन्ने लागेकै थिएन । मेरो पहिलो पटकको सहभागिता पनि हो । विजेता हुन पाउँदा खुसी छु’, उनले भनिन्, ‘मजस्तै लुकेका प्रतिभा धेरै भए पनि अवसर नपाएको हुनसक्छ । उहाँहरूलाई यस्ता अवसरहरू नगुमाउन पनि आग्रह गर्दछु ।’
विजेता मगरलाई एक लाख बराबरको पुरस्कारले पुरस्कृत गरिएको रेडियो अन्नपूर्ण नेपालका स्टेसन म्यानेजर शिरोमणि दवाडीले जानकारी दिए । प्रतियोगिताको रेडियो अन्नपूर्ण नेपालका साथै देशभरका साझेदार विभिन्न १५ रेडियोबाट प्रत्यक्ष प्रसारण गरिएको थियो ।
प्रतिक्रिया दिनुहोस !
