ओक्लाहोमा : अमेरिकाको ओक्लाहोमा राज्यमा प्रेमीले प्रेमिकाको छोराको हत्या गर्दा प्रेमिका नै जेल परेकी छन् । प्रेमीले दुई वर्षीय छोराको हत्या गरी सम्पर्कविहीन बनेपछि उनी जेल परेकी हुन् ।
सन् २०२० को नयाँ वर्षको दिनमा सो घटना घटेको थियो । सो समयमा रेबेका होगका दुई वर्षीय छोरा राइडरलाई साथमा लिएर ओक्लाहोमास्थित नजिकैको एक क्यासिनोमा वेइट्रेसको रुपमा काम गर्थिन् । नयाँ वर्षको पार्टी चलिरहेको बेला काममा व्यस्त रहेकी रेबेकाले आफ्ना छोरा राइडरलाई आफू बस्ने घर (जहाँ रेबेका प्रेमीसँगै बस्थिन्)मा प्रेमी क्रिस्टोफरको जिम्मामा छोडेकी थिइन् ।
१२ घण्टापछि कामबाट फर्किएकी रेबेकाले भोलिपल्ट बिहान आफ्नो छोराले श्वास नफरेको थाहा पाएपछि प्रहरी र आफ्ना प्रेमीसँग गुहार मागेकी थिइन् । सो समयमा उनका प्रेमी काममा गएका थिए । रेबेकाको गुहारलगत्तै घटनास्थलमा पुगेको प्रहरीले पीडित बालकलाई अस्पताल पुर्याएको थियो भने घटनाको अनुसन्धान अघि बढाएको थियो । अस्पताल पुर्याइएका बालकलाई चिकित्सकले मृत घोषणा गरेका थिए ।
यता प्रहरीले अनुसन्धानमार्फत रेबेकाका छोरालाई उनका प्रेमी ट्रेन्टले कुटपिट गरेको फेला परेको थियो । सोही आधारमा प्रहरीले उनका प्रेमीको खोजी सुरु गरेको थियो । काममा गएका रेबेकाका प्रेमी उतैबाट फरार भएका थिए । यता प्रहरीले भने बच्चाको आमा नै सो घटनाको जिम्मेवार रहेको भन्दै रेबेकालाई पक्राउ गरी केही दिनका लागि हिरासतमा राखेको थियो ।
तर सो घटना भएको चौथो दिन रेबेकाका प्रेमीको शव विचिता पर्वतस्थित एउटा रुखमा झुण्डिएको अवस्थामा फेला परेको थियो । प्रहरीले उनले आत्महत्या गरेको पुष्टि गरेको थियो । आत्महत्या गरेको रुखमा उनका प्रेमीले लेखेको पत्र भेटिएको थियो । सो पत्रमा प्रेमी ट्रेन्टले रेबेका निर्दोष रहेको खुलाएका थिए ।
ट्रेन्टको मृत्युसँगै सो घटनाको अनुसन्धान २९ वर्षीमा प्रेमिका रेबेकातिरै मोडिएको थियो । करिब दुई वर्ष लामो समयसम्म चलेको सो मुद्दामा रेबेका नै प्रेमी र छोराको मृत्युप्रति जिम्मेवार रहेको भन्दै ओक्लाहोमा अदालतले जेल सजाय सुनाएको बीबीसीमा समाचार छ ।
ओक्लाहोमामा आफ्ना सन्तानलाई दुर्व्यवहार हुनबाट बचाउन नसक्ने अभिभावकलाई हत्यारासरह जेल सजाय सुनाइन्छ । आफ्ना सन्तानलाई सुरक्षा दिन नसक्ने अभिभावकलाई अझै पनि विभिन्न अमेरिकी राज्यले कडा कानूनी व्यवस्था लागु गर्दै आएका छन् ।
पछिल्लो समय रेबेकाको मुद्दाले स्थानीय सञ्चारमाध्यम र महिला अधिकारकर्मीको ध्यान तानेको बताइएको छ ।
प्रतिक्रिया दिनुहोस !
