फेब्रुअरी १६ मा रूसले आक्रमण गर्न सक्छ : युक्रेनी राष्ट्रपति
युक्रेन : युक्रेनी राष्ट्रपति भ्लादिमिर जेलेन्स्कीले सोमबार आफ्नो फेसबुक पोस्टमा फेब्रुअरी १६ मा रूसी आक्रमण हुन सक्ने घोषणा गरेका छन्। युक्रेन र रुसबीच बढ्दो तनावबीच यो घोषणा भएको हो ।
जेलेन्स्कीले राष्ट्रका नाममा सम्बोधन गरेको विषय फेसबुकमा पोस्ट गर्दै भनेका छन्, 'हामीलाई भनिएको छ कि फेब्रुअरी १६ आक्रमणको दिन हुनेछ।' उनले युक्रेनले बुधबार एकता दिवस मनाउने बताएका छन्। यस सम्बन्धी अध्यादेशमा हस्ताक्षर भइसकेको बताइएको छ ।
रुसले युक्रेनी सीमा नजिकै एक लाखभन्दा बढी सेना परिचालन गरेको छ । सेनाको उपस्थितिले अमेरिका र नाटो सहयोगीबीच चिन्ता र तिक्तता बढाएको छ। तर रुसले निरन्तररूपमा आक्रमणको कुनै योजना नभएको बताउँदै आएको छ।
युक्रेन, रुस र नाटो राष्ट्रहरूका अधिकारीले यस क्षेत्रमा तनाव कम गर्ने आशाका साथ पछिल्ला दिनमा कूटनीतिक छलफललाई तीव्रता दिंदै आएका छन् । तर वार्ताले कुनै सफलता भने हासिल गर्न सकेको छैन।
यसअघि अमेरिकी राष्ट्रपति जो बाइडेनले शनिबार रुसी राष्ट्रपति भ्लादिमिर पुटिनसँग कुरा गर्दै रुसले युक्रेनमा आक्रमण गरेमा 'छिटो र गम्भीर लागत' लाग्ने बताएका थिए।
बाइडेन प्रशासनका अधिकारीले युक्रेनमाथि 'अब कुनै पनि दिन' आक्रमण हुन सक्ने चेतावनी दिएका छन्। रासस