भैरहवा : भैरहवामा निर्माण सम्पन्न भएको गौतमबुद्ध अन्तराष्ट्रिय विमानस्थलमा शुक्रबाबाट यान्त्रिक परीक्षण (क्यालिब्रेसन फ्लाइट) उडान सुरु भएको छ । विमानस्थलमा करिब १० दिन यान्त्रिक परीक्षण उडान हुनेछ ।
आइसीबी टू को आयोजना अन्र्तगत एरो नोटिकल रेडियो अफ थाइल्याण्ड (एरो थाई) को प्राविधिकसहितको विशेष विमानमार्फत यान्त्रिक परीक्षण भइरहेको छ । यान्त्रिक परीक्षणका लागि बिहीबार थाइल्याण्डबाट विशेष विमान भैरहवा आएको थियो ।
विमानस्थल संचालन अघि जडान गरिएको संचार उपकरणहरुको परिक्षणका लागि क्यालिब्रेसन उडान गर्नुपर्ने हुन्छ । विमानस्थलमा कम्युनिकेशन, नेगिभेसन र सर्विलान्स चेकजाँच गरी विमानस्थलबाट उडान योग्य रहे/नरहेको रिपोर्ट आउनेछ । र, सोही अनुसार थप प्रक्रियाहरु अघि बढाइन्छ ।
शुक्रबार एटिइ ०३ कल साइन भएको बिचक्राफ्ट बी ३५० आई किंग एअर नामक विशेष विमानले विमानस्थलबाट उडान भरेको थियो । उडान भरेको विशेष विमान मार्फत विमानको दिशा र दूरी जाँच गर्ने यन्त्रको परीक्षण गरिएको विमानस्थलको आइसीबी टू का आयेजना प्रमुख प्रविण न्यौपानेले बताए ।
विशेष विमानले नवलपरासीको बर्दघाट, कपिलवस्तुको धनकौली, लुम्बिनी, मर्चवारलगायत क्षेत्रको आकाशमा घण्टौँसम्म उडान गरेको थियो । उनले विमानस्थलमा जडान गरिएको संचार उपकरण लगायतको विशेष विमान मार्फत यान्त्रिक परीक्षण सुरु भएको बताए ।
उनका अनुसार क्यालिबे्रसन फ्लाइट भनेको विमानस्थलको ग्राउन्ड र विमानबीचको सूचना आदानप्रदान सही छ/छैन भनेर जाँच गर्ने हो । यसैको लागि पाइलट, को–पाइलटसहित सातजनासहित विशेष विमानले काम थालेको छ ।
यसले विमानस्थललाई केन्द्रित गरेर उडान गर्नेछ । उडानका क्रममा एन्टिना, सिग्नल रिसिभ, लाइटिङ, कम्युनिकेशन लगायत सबै सूचना ठीक छ/छैन भनी परीक्षण हुनेछ । क्यालिब्रेशन फ्लाइटलगत्तै नेपाल एयरलाइन्सको बोइङ विमानमार्फत विमानस्थलको परीक्षण गरिने नागरिक उड्डयन प्राधिकरणले जनाएको छ । त्यसपछि अधिकतम ५६ वा न्युनतम ४२ दिन पछि विमानस्थलमा नियमित उडानहरु गरिने प्राधिकरणको भनाइ छ ।
‘विमानस्थलको भौतिक संरचना र जडान गरिएको उपकरणको हिसाबले शुक्रबारदेखि क्यालिब्रेसन उडानका सुरु गरेका छौँ,' विमानस्थल आयोजनाका प्रमुख प्रवेश अधिकारीले भने, ‘यो विमानस्थलाई अन्तराष्ट्रिय विमानस्थलको रुपमा मान्यता प्राप्त गराउनका लागि क्यालिब्रेसन उडान हाम्रो लागि पहिलो पाइला हो ।’
अगामी ०७९ साल जेठ २ गते बुद्ध जयन्तीका दिन विमानस्थल संचालन गर्ने लक्ष्य राखिएको छ ।
प्रतिक्रिया दिनुहोस !
