लोकगीतका अग्रज स्रष्टा जयनन्द लामाको सांगीतिक योगदानलाई सम्झँदै बिहीबारको नेपाल आइडलको दैलो खुलेको थियो। आइडल परिवारले लामाकोे निधनले नेपाली संगीत क्षेत्रमा अपुरणीय क्षति पुगेको भन्दै उनीप्रति श्रद्धाञ्जलि व्यक्त गरेको थियो। एपीवान टेलिभिजनबाट हरेक हप्ता प्रशारण हुने नेपाल आइडल सिजन–४ को फाइनल मिति नजिकिँदै गर्दा प्रतिस्पर्धा भने तीव्र बनेको छ। बिहीबारको कार्यक्रममा बटम थ्रीमा लक्ष्मी पौडेल, सुमिन पाख्रिन र कानदेन लिम्बू परेका थिए।
अघिल्लो हप्ताको प्रस्तुतिका आधारमा सबैभन्दा कम भोट ल्याएको प्रतियोगी बाहिरिने नियम अनुसार बिहीबार कानदेव लिम्बू बाहिरिए। वाइल्ड कार्डका रुपमा गत हप्ता मात्रै कार्यक्रममा इन्ट्री पाएका कानदेन लिम्बू उत्कृष्ट आठबाटै बाहिरिए। जाँदाजाँदै उनले नेपाल आइडलमा दिएको प्रस्तुतिको झलक देखाइएको थियो। उनी बाहिरिँदै गर्दा निर्णायक तथा उपस्थित दर्शक स्तब्ध बनेका थिए। निर्णायक सुगम पोखरेलले उनी बाहिरिँदा नरमाइलो लागेको बताए। ‘तपाई एउटा खोलाजस्तै बन्नुस्। बाटो भेट्नुहुन्न आफैँ बनाउँदै जानुस्’, उनले भने।
नेपाल आइडलका निर्देशक तथा प्रोजेक्ट हेड सुरेश पौडेलका अनुसार नेपाल आइडल सिजन–४ का प्रतियोगीहरूले उत्कृष्ट प्रस्तुति दिइरहेका छन्। आगामी चैत पहिलो हप्ता नेपाल आइडल सिजन–४ को विजेता घोषणा हुनेछ।
प्रतिक्रिया दिनुहोस !
