युक्रेन भन्छ : यो युद्ध हामी जित्छौं, न आत्मसमर्पण गर्छौँ न झुक्छौँ
किभ : स्याटेलाइट इमेजरी कम्पनी म्याक्सार टेक्नोलोजीका अनुसार यसअघि रुसी सैनिकको लाइन युक्रेनतर्फ २७ किलोमिटर लामो थियो, जुन अहिले बढेर ६० किलोमिटर पुगेको जनाएको छ ।
म्याक्सरका अनुसार दक्षिणी बेलारुसमा पनि रुसी सेना र हेलिकप्टर उपस्थित छन्। यो युक्रेनी सीमाबाट मात्र २०किलोमिटर टाढा पर्छ।
यसैबीच युक्रेनका विदेशमन्त्री दिमित्रो कुलेबाले सीएनबीसीलाई दिएको अन्तर्वार्तामा आफ्नो देशले आत्मसमर्पण नगर्ने बताएका छन् । कुलेबाले भने, ‘युक्रेन कूटनीतिक समाधानका लागि तयार छ, तर हामी न त आत्मसमर्पण गर्छौँ न झुक्नेछौँ।’
वार्ता कहिलेसम्म चल्ने हो थाहा नभएको कुलेवाले बताए । उनले यो युद्धमा युक्रेनले जित्ने बताए ।
कुलेबाले सीएनबीसीलाई दिएको अन्तर्वार्तामा भने, ‘म कूटनीतिज्ञ हुँ र वार्ताको सफलतामा म विश्वस्त छु । तर एक कूटनीतिज्ञको हैसियतमा मेरो उद्देश्य रुसमाथि अधिकतम प्रतिबन्ध लगाउनु पनि हो। युक्रेनले धेरै भन्दा धेरै हतियार ल्याउनु पर्छ र रुसलाई अन्तर्राष्ट्रिय स्तरमा एक्लो पार्नु पर्छ। यो मेरो कूटनीतिको महत्वपूर्ण भाग हो।'
रुसले युक्रेनमा जमिन र आकाश दुवैबाट आक्रमण सुरु गरेको छ । रिपोर्टसका अनुसार रुसले धेरै ठूला सहरलाई निशाना बनाएको छ । आक्रमणका कारण युक्रेनका जनता आफ्नो ज्यान बचाउन पूर्वी युरोपका देशहरूमा भागिरहेका छन् । पश्चिमा राष्ट्रहरुले रुसमाथि लगातार प्रतिबन्ध लगाएका छन् । सोमबार रुसको मुद्रा रुबल प्रतिबन्धका कारण अमेरिकी डलरको तुलनामा २९ प्रतिशतले घटेको छ ।
पुटिनका कारण रुसका आम जनताले सास्ती भोग्नुपरेको कुलेवाले बताए । कुलेबाले हरेक रुसी रुबलमा युक्रेनीको रगत दलिएको बताए । बीबीसी