काठमाडौं : हरेक हप्ता बिहीबार र शुक्रबार एपीवान टेलिभिजनबाट प्रशारण भइरहेको नेपाल आइडल सिजन–४ को २७औं कार्यक्रम विशेष भयोे। कार्यक्रममा अतिथि कलाकारका रुपमा गीतकार उन्नति बोहरा शिला उपस्थित भएकी थिइन्।
उत्कृष्ट ६ का प्रतिस्पर्धीको हौसला बढाउन नेपाल आइडलको अघिल्लो सिजनका प्रवीण बेडुवाल, अस्मिता अधिकारी, विक्रम बराल, निसान भट्टराई, प्रताप दास र पवन गिरी उपस्थित भएका थिए।
कार्यक्रममा उनीहरू सबैले प्रस्तुति पनि दिएका थिए। कार्यक्रममा बटम थ्रीमा सुमिन पाख्रिन, विश्वास उप्रेती र नाम्गेल तामाङ परेका थिए। विश्वास र नाम्गेलले उत्कृष्ट पाँचमा स्थान बनाउँदा सुमिन भने नेपाल आइडलको मञ्चबाट बाहिरिन्। 
अघिल्लो हप्ताको प्रस्तुतिका आधारमा कम भोट ल्याउने सुमिन बाहिरिएकी हुन्। उनी बाहिरिँदा कार्यक्रममा उपस्थित सबैको आँखा रसाएका थिए। मञ्चबाट बाहिरिँदै गर्दा उनले हजारौंबाट आफूलाई उत्कृष्ट ६ को स्थानसम्म पुर्याउने सबैलाई आभार व्यक्त गरेकी थिइन्। ‘खेलमा सहभागी भएपछि हार र जित स्वीकार गर्नैपर्ने भएकाले आजको यो नतिजालाई म जितको रुपमा स्वीकार गर्छु’, उनले भनिन्।
कार्यक्रमको सुरुवात ‘सेती खोला सँगै तर्छु है’ बोलको सामूहिक गीतमार्फत गरिएको थियो। बिहीबार सबै प्रतिस्पर्धीले उत्कृष्ट प्रस्तुति दिएका थिए।
फाइनल नजिकिँदै गर्दा नेपाल आइडलका प्रतियोगीहरूबीच कडा प्रतिस्पर्धा चलिरहेको छ। उनीहरू आफूलाई अब्बल सावित गर्न उत्कृष्ट प्रस्तुति दिइरहेका छन्। गायनमा मात्रै होइन, सुर, ताल र प्रस्तुतिमा पनि उनीहरू उत्तिकै उत्कृष्ट देखिएका छन्।
गत मंसिर २३ गतेदेखि एपीवान टेलिभिजनमा प्रशारण भइरहेको कार्यक्रम प्रतिस्पर्धात्मकका साथै उत्कृष्ट बनेको नेपाल आइडलका प्रोजेक्ट हेड सुरेश पौडेल बताउँछन्। उनका अनुसार चैत ५ गते नेपाल आइडल सिजन–४ को विजेता घोषणा हुनेछ। यसपटक उत्कृष्ट पाँचबाट नै विजेता छानिने भएको छ।
प्रतिक्रिया दिनुहोस !
