फाइजर खोपले बालबालिकामा ओमिक्रोनको जोखिम घटायो
काठमाडौं : कोभिड विरुद्धको फाइजर खोपले बालबालिकामा ओमिक्रोन संक्रमणको जोखिम उल्लेखनीय रुपमा कम गराएको एक अध्ययनले देखाएको छ। संयुक्त राज्य अमेरिकामा भएको एक अध्ययनले फाइजरको दुई मात्रा खोपले यो संक्रमणमा उल्लेखनीय रुपमा कमी गराएको पाइएको उल्लेख छ।
अमेरिकाको सेन्टर फर डिजीज कन्ट्रोलले गरेको अनुसन्धानबाट यो तथ्य पत्ता लागेको बताइएको छ। यो खोप लगाएका ५ देखि १५ वर्ष उमेर समूहका बालबालिकामा सो अनुसन्धान गरिएको थियो।
उक्त अनुसन्धान सन् २०२१ को जुलाईदेखि २०२२ को फेब्रुअरी महिनासम्मको गरिएको थियो। सो अध्ययनबाट फाइजर खोपको दुई मात्रा खोप लगाएका ५ देखि १२ वर्षका बालबालिकामा ओमिक्रोनको संक्रमण ३१ प्रतिशतले कम भएको देखिएको थियो।
त्यसैगरी १२ देखि १५ वर्ष उमेर समूहका बालबालिकामा यो जोखिम ५९ प्रतिशत कम भएको देखिएको सिडीसीले जनाएको छ। रासस