करिब ५/६ सय रुसी सैनिकले आत्मसमर्पण गरेको जेलेन्स्कीको दावी
किभ : युक्रेनी राष्ट्रपति भोलोडिमिर जेलेन्स्कीले रुसको आक्रमणमा हालसम्म १३ सय युक्रेनी सैनिक मारिएको बताएका छन्। राजधानी किभमा आयोजित पत्रकार सम्मेलनमा जेलेन्स्कीले युद्धमा ठूलो संख्यामा रुसी सैनिकले पनि ज्यान गुमाएको बताए।
उनले शुक्रबारको युद्धमा ५०० देखि ६०० रुसी सैनिकहरूले आत्मसमर्पण गरेको बताएका छन्।
उनले रुसी सेनामा रहेका धेरै व्यक्तिलाई युद्धको मैदानमा किन पठाइयो भन्ने पनि नखुलेको बताए। एक पलटनले हतियार राख्दै आफूलाई यहाँ मान्छे मार्न पठाएको थाहा नभएको उनको दाबी छ।
देशका उपप्रधानमन्त्री इरिना वीरेशचुकले शनिबार करिब १३,००० युक्रेनी नागरिकलाई मानवीय करिडोरमार्फत बाहिर निकालेर सुरक्षित स्थानमा पठाइएको बताइन्। उनले शुक्रबार आधा संख्यामा त्यहाँबाट बाहिर निकाल्न सकिने बताए।
इरिना विरेश्चुकले मारिउपोल सहरमा रुसी सेनाको आक्रमण रोकिएन, जसका कारण मानिसहरूलाई सुरक्षित रूपमा बाहिर निकाल्न नसकेको आरोप लगाइन्। यसअघि रुसले युक्रेनमाथि आरोप लगाए पनि युक्रेनी सेनाले जानाजानी शहरमा मानिसहरूलाई थुनेको थियो। बीबीसी