एनआरएनएको महाधिवेशन स्थगित, घले समूहले घोषणा गर्यो यो नयाँ नेतृत्व
काठमाडौं : गैरआवासीय नेपाली संघ (एनआरएनए) को चैत्र १० र ११ गते तय भएको १० औं महाधिवेशन स्थगित भएको छ । उच्च अदालत पाटनले अल्पकालिन अन्तरिम आदेश जारी गरी निर्वाचनसम्बन्धी सबै काम/कारवाही नगर्नू-नगराउनू भनेको छ । आदेशसँगै एनआरएनएको निर्वाचन समितिले निर्वाचनका सबै काममा रोक लगाएको हो ।
सबैको अस्तित्व स्वीकार गर्दै अदालतमा गरिएको मुद्धा फिर्ता लिने शर्तमा एनआरएनएमा त्रिपक्षीय सहमति भएको थियो । अध्यक्षका आकांक्षी डा.बद्री केसी, कुल आचार्य र रबिना थापाबीच सहमति भइ आगामी कार्याकालका लागि तीन अध्यक्ष बन्ने तय भएको थियो ।
संघमा देखिएको प्रतिनिधि विवादलाई समाधान गरी संकट समाधान गर्न म्यान्डेट दिइएकोमा दुरुपयोग गरी एकतर्फी रुपमा संघलाई विभाजन गर्ने उद्देश्यले एकपक्षीय निर्वाचन गरिएकोमा आपत्ति जनाएका छन् । त्यतिबेला संघमा देखिएको विवाद समाधानका लागि उच्चस्तरीय समितिले छानबिन गरेबमोजिम वास्तविक प्रतिनिधि समावेश गरी विवाद रहित, स्वतन्त्र निर्वाचन र महाधिवेशन गराउन म्यान्डेट दिएको थियो ।
तर, म्यान्डेट विपरित विवादास्पद प्रतिनिधि छानबिन नगरी, वास्तविक प्रतिनिधिको नाम प्रकाशित नगरी, एकपक्षीय ढंगले एनआरएनए एनसीसीहरूले सिफारिस गरेका प्रतिनिधिहरुको संलग्नता बेगरै निर्वाचन गरेकोमा आपत्ति जनाइएको विज्ञप्तिमा उल्लेख छ ।
गैरआवासीय नेपाली संघ (एनआरएनए) अमेरिकाका अध्यक्ष बुद्धी सुवेदीले एनसिसिका अध्यक्षहरुले गत ६ मार्च २०२२ मा म्यान्डेट दिए पनि घलेले दुरुपयोग गरेको जनाएका छन् । म्यान्डेट फिर्ता लिइएको समेत जनाइएको छ । दशौं महाधिवेशनबाट २०२१–२०२३ कार्यकालका लागि घलेले बिनोद कुँवरलाई अध्यक्ष बनाएका छन् । उनले उपाध्यक्षमा उमेश पुडासैनी, थर्क सेन, बाबुराम लामा, सुरेन्द्र सिग्देल र महिला उपाध्यक्षमा भोमा लिम्बु, महासचिवमा जानकी गुरुङ, सचिवमा जुनु गुरुङ, कोषाध्यक्षमा डिलाराम खरेल चयन भएको घोषणा गरेका छन् ।
एनआरएनए नेतृत्वले अदालतको निर्णयलाई सम्मान गर्दै महाधिवेशन स्थगित गरिएको जनाएको छ । विवाद टुंग्याएर छिट्टै १० औं महाधिवेशन गर्ने एनआरएनले जनाएको छ ।