इश्वरपुरमा झडप : जसपाका प्रमुख सचेतक साह घाइते, युवाले खोसे पेस्तोल र गोली

मलङ्वा : सर्लाहीको इश्वरपुर नगरपालिका-६ बयलबास बजारमा बाटोको विषयमा विवाद हुँदा दुई पक्षबीच झडप भएको छ। झडपमा परेर जनता समाजवादी पार्टीका प्रमुख सचेतक एवम् सर्लाही क्षेत्र नं. १ का संघीय सांसद प्रमोद साह घाइते भएका छ्न्। 

सांसद साहको टाउको र पिठ्युमा गम्भीर चोट लागेको छ । गम्भीर घाइते भएका साहको स्थानीय अस्पतालमा उपचार भइरहेको छ । 

बाटो विस्तार गर्ने क्रममा बाटो छेउमा रहेको फुलजोर युवा क्लबको भवन भत्काइएको थियो । बाटोको सीमांकन भइ सकेपछि बाँकी रहेको जमिनमा क्लबको भवन बनाउनुपर्ने युवाहरुको माग रहेको छ । तर सांसद साहले भत्केको क्लबको भवनलाई त्यस ठाउँमा नबनाई अर्को ठाउँमा बनाउनुपर्ने भनेपछि युवाहरु आक्रोशित बनेका हुन्। 

सांसद साहले आफ्ना समर्थक लिएर बजारमा प्रदर्शन गर्न जाँदा युवाहरु आक्रमणमा उत्रेका थिए । घटनामा साहको सुरक्षागार्ड असइ विनोदप्रसाद यादवलाई समेत कुटपिट भएको छ । यादवको साथमा रहेको पेस्तोल र ७ राउन्ड गोलीसमेत युवाहरुले खोसेर लगेको यादवले बताएका छ्न् । युवाहरुले एउटा भारतीय स्करपियो र करिब १ दर्जन मोटरसाइकल समेत तोडफोड गरेका छन् ।