वीरगंजबाट जनकपुर जाँदै गरेको बस सर्लाहीमा पुलबाट खस्यो, ४ जनाको मृत्यु
चैत १३, २०७८ आइतबार १३:२३:०
मलंगवा : पूर्व–पश्चिम राजमार्गअन्तर्गत सर्लाहीको लालबन्दी नगरपालिका १७ स्थित फुलजोर खोलाको पुलबाट बस खस्दा ४ जना यात्रुको मृत्यु भएको छ । दुई दर्जन बढी घाइते भएको हुनसक्ने जनाइएको छ । वीरगंजबाट जनकपुरतर्फ जाँदै गरेको ना.४ ख ८५५५ नम्बरको सूर्यलोक यात्रुबाहक बस पुलबाट तल खोलामा खस्दा ४ जनाको मृत्यु भएको प्रहरीले जनाएको छ ।
मृतकहरुको अहिले पहिचान खुल्न सकेको छैन् । मृतक चारैजनाको शव पोष्टमार्टमका लागि जिल्ला अस्पताल मलंगवामा ल्याइएको छ । घाइतेहरुको संख्या पनि अहिले यकिन हुन नसकेको प्रहरीले जनाएको छ । घाइतेहरुको लालबन्दीको विभिन्न स्वास्थ्य केन्द्रहरुमा उपचार भइरहेको छ । गम्भीर भएकाहरुलाई रिफर गर्ने काम पनि भइरहेको प्रहरीले जनाएको छ ।
प्रारम्भिक अनुसन्धानले बसको अगाडिको चक्का पड्किएर अनियन्त्रित भई पुलबाट खसेको बताइए पनि यर्थात् जानकारी आउन सकेको छैन् ।
प्रतिक्रिया दिनुहोस !
