लालीगुराँसले रंगियो घोडेपानी (तस्बिर)

घोडेपानी : लालीगुराँसले ढकमक्क बनेको म्याग्दीको अन्नपूर्ण गाउँपालिका–६ मा रहेको घोडेपानी पुनहिल क्षेत्र पर्यटकको पर्खाइमा छ । चारैतिर घना गुराँसको जंगलको बीचमा रहेको घोडेपानीका घरको झ्यालबाटै जंगलको पृष्ठभूमिमा लहरै हिमाल देखिन्छ । शान्त, एकान्त वातावरणमा अवस्थित यो ठाउँ वसन्त ऋतुको आगमनसँगै फुलेका लालीगुराँसले अझै मनमोहक र आकर्षक बनेको घोडेपानी टोल सुधार समितिका संयोजक बिरेन गर्बुजा बताउँछन् । 

'घोडेपानी लालीगुराँसले ढकमक्क भइसकेको छ, 'उनले भने, 'हामी पर्यटकलाई स्वागत गर्न आतुर छौं ।' जाडो हटेको र वनजंगलमा लालीगुराँस फुलेपछि रमाइलो वातावरण बनेको छ । चैत–बैशाख गुराँस फुल्ने याम हो । यहाँ रातो, सेतो, चिमाली, सिमाली लगायत जातका गुराँस पाइन्छ । 

पाखोमा फुलेका गुराँसको जंगलको पृष्ठभूमिमा धौलागिरि, गुर्जा, अन्नपूर्ण, माछापुच्छ्रे लगायत १६ भन्दा बढी हिमाल र सुर्योदयको दृष्य अवलोकन गर्न सकिन्छ । विश्वमा ४२ प्रजातिको गुराँस पाईन्छ । नेपालमा ३२ प्रताजीका छन् । घोडेपानी क्षेत्रमा १६ प्रजातीका लालीगुराँस पाईने अध्ययन प्रतिवेदनहरुमा उल्लेख छ । 

लालीगुराँस नेपालको राष्ट्रिय फुल पनि हो । एकै स्थानमा धेरै प्रजातिका गुराँस पाईने यस क्षेत्रको जंगल गण्डकी प्रदेशकै ठूलो दावी गरिएको छ । गुराँसले भरिएको जंगलमा भ्रमण गर्न र प्राकृतिक सौन्दर्यमा रमाउन आउने पर्यटकको चहलपहल बढेको छ ।
  
बेनी, बागलुङ, पोखरा, चितवन, काठमाडौ लगायत क्षेत्रबाट बिद्यार्थी, कर्मचारी र व्यापारीहरु समूह बनाएर घोडेपानी भ्रमणमा आएका छन् । घोडेपानी पर्यटक प्रहरी कार्यालयका प्रमुख प्रहरी नायव निरीक्षक प्रेमराज गौलीका अनुसार दैनिक ६०/७० जना विदेशी र १०० जना नेपाली पर्यटकहरु भ्रमणमा आएका छन् । 

‘घोडेपानी–पुनहिल घुम्न आउने विदेशी पर्यटकको तथ्याङ्क हामीले राख्ने गरेका छौं,'उनले भने, 'कोरोना महामारी फैलिएपछि २०७६ चैत देखि रोकिएको पर्यटकको उपस्थिति गत फागुन देखि हुन थालेको छ ।' काठमाडौंबाट ८ जनाको समूहमा घोडेपानी घुम्न आएकी अक्षता भट्टराईले बजारदेखि टाढाको एकान्त वातावरण र गुराँसले रंगिएको जंगलमा पदैलयात्रा गर्दा रमाइलो महशुस भएको बताइन् । गुराँस, पहाड, हिमाल, सुर्योदयको दृष्यबाट मोहित भएको चितवनकी पुनम खरेलले अनुभव सुनाइन् । 

फागुन महिनासम्म सुनसान घोडेपानीमा गुराँस फुल्न थालेपछि चहलपहल बढेको घोडेपानी होटल व्यवस्थापन उपसमितिका अध्यक्ष मिना पुनले बताइन् । 'स्वदेशी पर्यटकलाई आकर्षित गर्न सहुलियतको व्यवस्था मिलाएका छौं, 'उनले भनिन्, 'घोडेपानीमा रहेका २७ वटा होटललाई सुविधा र पुर्वाधारको आधारमा दुई समूहमा वर्गीकरण गरेका छौ । ११ वटा होटललाई (क) र १६ वटालाई (ख) समूहमा वर्गिकरण गरेर फरक फरक दररेट बनाइएको हो ।'

एकरात बास बसेको, बेलुकाको खाना, बिहानको खाजासहित ९५० देखि एक हजार ६०० रुपैयाँको प्याकेज बनाएका छन् । यसअघि सबै होटलहरुले प्रतिव्यक्ति एकरात बास बसेको, बेलुकाको खाना र बिहानको खाजाको एक हजार पाँच सय रुपैयाँ शुल्क लिने गरेका थिए । 

घोडेपानीका होटलमा दैनिक एक हजार बढीका लागि बासको व्यवस्था छ। फागुन २८ गतेको बैठकले गरेको होटल वर्गीकरण र शुल्कको नयाँ दररेट २०७८ चैत १ गतेदेखि लागू हुने उपसमितिका अध्यक्ष पुनले बताइन् ।  

अन्नपूर्ण चक्रीय पदमार्गको प्रमुख गन्तव्य घोडेपानी समुन्द्री सतहदेखि दुई हजार आठ सय मिटरको उचाइमा  छ । घोडेपानीदेखि ३० मिनेट उकालो हिँडेपछि पुनहिल पुग्न सकिन्छ । समुन्द्री सतहदेखि तीन हजार २०० मिटर उचाइमा रहेको पुनहिलबाट सुर्योदय, हिमाल र लालीगुराँसको जंगल अवलोकन गर्न आउने पर्यटक घोडेपानीमा बास बस्ने गर्छन् ।