एनवाइएफ सर्ट मुभी कम्पिटिसन २०७८ : उत्कृष्ट ३ चलचित्रलाई ५ लाख नगद पुरस्कार
चैत २२, २०७८ मंगलबार १३:७:०
काठमाडौं : राष्ट्रिय युवा संघ नेपालद्वारा आयोजित 'एनवाइएफ सर्ट मुभी कम्पिटिसन २०७८'भव्यताका साथ सम्पन्न भएको छ । नेकपा (एमाले) अध्यक्ष तथा पूर्वप्रधानमन्त्री केपी शर्मा ओलीको प्रमुख आतिथ्यतामा सोमबार प्रतियोगिताको विजेता घोषणा तथा पुरस्कार वितरण गरिएको हो ।
प्रतियोगितामा 'प्रश्न' नामक लघु चलचित्र प्रथम भएको छ भने क्रमश: एसओपी र खाली सीसीले दोस्रो र तेस्रो स्थान हासिल गर्न सफल भएका छन् । विजेता लघु चलचित्रलाई ट्रफी र प्रमाणपत्रसहित क्रमश: २ लाख ५० हजार, १ लाख ५० हजार, १ लाखको नगत पुरस्कार प्रदान गरिएको छ । पुरस्कार वितरण समारोहमा नेपाली चलचित्र क्षेत्रका दिग्गज व्यक्तित्वहरूले विशेष उपस्थिति जनाएका थिए ।
राष्ट्रिय युवा संघ नेपाल, कार्यालय सदस्य क्षितिज थेबेको संयोजनमा सम्पन्न एनवाइएफ सर्ट मुभी कम्पिटिसन ‘म केही गर्छुु थिमसहित युवाहरुको सकरात्मक सोच र प्रतिभा प्रस्फुटनका लागि आयोजना गरिएको आयोजना राष्ट्रिय युवा संघ नेपालका संयोजक तथा नेकपा ९एमाले०का केन्द्रीय सदस्य किरण पौडेलले जानकारी दिए ।
संयोजक पौडेलका अनुसार कोभिड १९ महामारीले नेपालीलाई घरभित्रै बन्धक बनाएका बेला 'म केही गर्छु' लघु चलचित्र प्रतियोगिताको सुरुवात गरिएको थियो । यो बेला युवाहरुको समय सदुपयोग तथा प्रडक्टिभ इन्गेजमेन्टसँगै युवाको प्रतिभा पहिचान, प्रस्फुटन तथा प्रवर्द्धन गर्ने उद्देश्य यस प्रतियोगिता आयोजना गरिएको हो ।
प्रतियोगिताको पहिलो चरणमा युवा वर्गलाई आफ्नो रचनात्मक प्रस्तुतीका लागि लघु चलचित्रको पटकथा बुझाउन आह्वान गरिएको थियो । युवाहरुबाट पटकथा प्राप्त पटकथा मध्ये ७५ वटा पटकथा ‘म केही गर्छु’लघु चलचित्र प्रतियोगिताका लागि चयन गरिएको थियो ।
चयन गरिएका ७५ वटा पटकथाबाट ४५ वटा पटकथालाई लघु चलचित्र निर्माणका लागि चयन गरिएको हो । विभिन्न चरणबाट निर्माण गरिएका ४५ वटा पटकथाबाट फेरि १० वटा लघु चलचित्र चयन गरियो र अन्तिममा १० वटा चलचित्र मध्ये सोमबारको समारोहमार्फत् तीनवटा लघु चलचित्रलाई विजेता घोषणा गरिएको हो ।
संयोजक पौडेलले प्रतियोगितालाई सफल बनाउन क्रियाशील संघका सम्पूर्ण नेता, कार्यकर्ता,संचारकर्मी,फोटो पत्रकार संघलगायत सम्पूर्ण सहयोगी संस्थालाई धन्यवाद ज्ञापन गरे । साथै सोही कार्यक्रमबाट राष्ट्रिय युवा संघ नेपालकै साइबर सर्कल विभागले ६ लाख पुरस्कार राशीको 'निर्वाचन र नेकपा एमाले' शीर्षकको टिकटक भिडियो प्रतियोगितसमेत घोषणा गरेको छ ।
प्रतिक्रिया दिनुहोस !
