वीरगन्ज : वीरगन्जबाट सशस्त्र प्रहरीले एकै दिन झण्डै एक करोड ५० लाख रुपैयाँ मुल्यको तस्करीको सामानसहित दुईवटा ट्रक नियन्त्रणमा लिएको छ । सशस्त्र प्रहरी बल १३ नम्बर गण हेड क्वार्टरबाट खटिएको सशस्त्र प्रहरीको टोलीले वीरगन्जबाट मालसामन लिएर पथलैयातर्फ जाँदै गरेको दुवै ट्रक वीरगन्ज १४ गण्डकबाट नियन्त्रणमा लिएको हो ।
सशस्त्र प्रहरी उपरीक्षक तेजप्रसाद पोखरेलका अनुसार गोप्य सूचनाको आधारमा खटिएको सशस्त्र प्रहरीको टोलीले गण्डक चोकमा ना २ ख ९५४३ र ना ७ ख ९४२ नम्बरको दुवै ट्रक रोकेर चेकजाँच गरेको थियो । चेकजाँचका क्रममा ना २ ख ९५४३ नम्बरको ट्रकबाट भन्सार प्रज्ञापनपत्र नभएको (भन्सार राजश्व नतिरेको) मेडिकल उपकरण, औषधी र अन्य खुद्रा सामान गरि ९४ लाख ५३ हजार ५८ रुपैया मुल्य बराबरको सामान बरामद भएको सप्रउ पोखरेलले बताए ।
यस्तै, गण्डक चोकमै ना ७ ख ९४२ नम्बरको अर्को ट्रकमा पनि भन्सार प्रज्ञापनपत्र नभएको (भन्सार राजश्व नतिरेको) ५१ लाख ९२ हजार ६ सय १७ रुपैया मुल्यको कपडा र अन्य सामान फेला परेको पोखरेलले बताए । दुवै ट्रकबाट गरि एक करोड ४६ लाख ४५ हजार ६ सय ७५ रुपैया मुल्यको सामान बरामद भएको पोखरेलले जानकारी दिए ।
बरामद सामन र दुवै ट्रकको २५/२५ लाख गरि कुल एक करोड ९६ लाख ४५ हजार ६ सय ७५ रुपैयाँ मुल्यकांन गरी आवश्यक कारबाही लागि राजश्व अनुसन्धान कार्यालय पथलैयामा पठाइएको पोखरेलले बताए । पोखरेलका अनुसार, भारतबाट साइकल , मोटरसाइकल र भरिया मार्फत तस्करी गरि वीरगन्जस्थित ट्रान्सपोर्टको गोदममा ल्याएर भण्डारण गरेर ट्रान्सपोर्टबाट ट्रकमा लोड गरेर विभिन्न सहरमा लैजाने क्रममा सशस्त्र प्रहरीले बरामद गरेको हो ।
प्रतिक्रिया दिनुहोस !
