एमालेबाट जनकपुर उप -महानगरपालिकाको मेयरमा  शिवशंकरको नाम सिफारिस

जनकपुरधाम : स्थानीय तह निर्वाचन आगामी बैशाख ३० गतेका लागि दलीयदेखि निर्दलीयरुपमा उम्मेदवारी घोषणा हुन थालेको छ । सत्तारुढ गठबन्धन दल आन्तरिक तयारीमा रहेकै बेला नेकपा एमालेले भने उम्मेदवारी छनोट प्रक्रियालाई अघि बढाएको हो ।  एमालेले मधेश प्रदेशको राजधानी जनकपुरधाम उप-महानगरपालिकामा मेयर पदका लागि शिवशंकर साह (हिरा) को नाम सिफारिस गरेको छ । यस्तै मधेशको राजधानीसँगै रहेको लक्ष्मिनियाँ गाउँपालिकामा शम्भु साहको नाम सिफारिस गरेको हो ।  

आइतबार नेकपा एमालेको मधेश प्रदेश कमिटी सदस्य समेत रहेका साहको नाम मेयर पदका लागि छनोट गरिएको एमाले जनकपुरधाम नगर समितिका सचिव राजुकुमार साहले जानकारी दिए । नगर सचिव साहले जनकपुरधाम उपमहानगरको प्रत्यासी उम्मेदवारको नाम सर्वसम्मत सिफारिस गरिएको बताए । यस्तै लक्ष्मिनियाँ गाउँपालिकाबाट राष्ट्रिय युवा संघका सचिवालय सदस्य शम्भु साहको नाम सिफारिस गरिएको हो ।

यस्तै, जनकपुरधाम १० को वडाअध्यक्षको पदमा सुशिल कर्णको नाम वडास्तरीय बैठकबाट सर्वसम्मत रुपमा छनोट गरिएको श्याम किशोर मण्डलले बताए । यस्तै शनिबार बलराम महतोले स्वतन्त्ररुपमा जनकपुरधाम उप–महानगरपालिकाको मेयर पदका लागि उम्मेदवारी घोषणा गरेका थिए । मेयरमै जनकपुरधाम उप–महानगरपालिका ७ का वडा अध्यक्ष जानकीराम साहले समेत तयारी थालेका छन् ।

यता नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी नेपाल र राष्ट्रिय जनमोर्चाको गठबन्धनले भने अहिलेसम्म पनि टुंगो लगाउन सकेको छैन ।