परासी : पश्चिम नवलपरासीको प्रतापपुर गाउँपालिकाले सुत्केरी महिलाहरुका लागि छुट्टै कार्यक्रम सञ्चालन गरेको छ । सुत्केरी महिला र शिशुहरुको स्वास्थ्यमा सुधार ल्याउने उद्देश्यले पालिकाले 'उपाध्यक्ष सुत्केरी महिला भेटघाट कार्यक्रम' सञ्चालन गरेको हो । यो कार्यक्रमअन्तरगत उपाध्यक्षले सुत्केरी महिलालाई भेटेर पौष्टिक आहार वितरण गर्ने गरेको गाउँपालिकाका स्वास्थ्य शाखा प्रमुख कुन्दन कुमार सिंहले बताए । गाउँपालिकाकी उपाध्यक्ष अञ्जु कुमारी चौधरीले कार्यबहाक अध्यक्षको जिम्मेवारीसमेत समालेकी छन् ।
दुई वर्षअघि अध्यक्ष राजकुमार शर्माको सवारी दुर्घटनामा निधन भएपछि चौधरीले कार्यबाहकको जिम्मेवारी सम्हाल्दै आएकी हुन् । चालु आर्थिक वर्षदेखि कार्यक्रम सञ्चालन गरिएको हो । 'गाउँमा डुल्दा अधिकांश सुत्केरी महिलाको स्वास्थ्य अवस्था राम्रो देखिन । बच्चाहरुको अवस्था पनि त्यस्तै देखे । त्यसबारे सोध्दा आर्थिक अभावले प्रयाप्त खान समस्या हुने गरेको जानकारी पाएपछि कार्यक्रम सञ्चालनको सोंच बनाएर लागू गरेकी हुँ ,'कार्यबहाक अध्यक्ष चौधरीले भनिन् ।
थोरै रकमले पनि घरमै पौष्टिक आहार तयार गरेर खान सकिन्छ भन्ने सन्देश दिन पनि पौष्टिक आहार वितरण गरिएको उनले बताइन् । पौष्टिक आहारसँगै सुत्केरी र नवजात शिशुलाई चाहिने आवश्यक खाना र खोपसम्बन्धी स्वास्थ्य सन्देश उल्लेख गरेको कार्डसमेत घर घरमा वितरण गरिएको छ ।
पौष्टिक आहारमा एकजना सुत्केरी महिलालाई हलुवा प्याकेट, मिठो दलिया, मिक्स खिचडी र हलुवा गरी ३ वटा प्याकेट वितरण गरिएको छ । कार्यक्रमका लागि पालिकाले ५ लाख रकम विनियोजन गरिएको छ । ९ वटा वडा रहेको गाउँपालिकाको जनसंख्या ५१ हजार बढी छ ।
वर्षमा १ हजारबढी सुत्केरी हुने तथ्यांक रहेको स्वास्थ्य प्रमुख सिंहले जानकारी दिए । ति सबैलाई पौष्टिक आहार वितरण गर्ने लक्ष्य रहेको छ । तर विभिन्न कारणले कार्यक्रम ढिलो सुरु भएकाले यो आर्थिक वर्षमा ५ सय ५० जनालाई पौष्टिक आहार वितरण गरिने स्वास्थ्य शाखा प्रमुख सिंहले बताए ।
सबैभन्दा बढी जगन्नाथपुर प्राथमिक स्वास्थ्य केन्द्रमा मात्र वर्षमा ८ सय जना सुत्केरी हुने स्वास्थ्य शाखाले जनाएको छ । सुत्केरी महिलाको तथ्यांक संकलन गरी पालिकामा रहेका ३ वटा वर्थिङ सेन्टरमा पौष्टिक आहार वितरण गर्दै आएको छ। पालिकामा खैरटवा र प्रतापपुर स्वास्थ्य चौकीमा सुत्केरी सेवा छ । गाउँपालिकाले सञ्चालन गरेको कार्यक्रममार्फत वितरण गरिने पौष्टिक आहार पाउन स्वास्थ्य संस्थामा कम्तीमा ४ पटक स्वास्थ्य परीक्षण र स्वास्थ्य संस्थामै सुत्केरी गराएको हुनुपर्ने छ । उक्त स्वास्थ्य सेवा लिएका सुत्केरीलाई सरकारले १८ सय रुपैयाँ दिने गरेपनि गाउँपालिकाले २ सय थप गरेर दिने गरेको छ ।
प्रतिक्रिया दिनुहोस !
