राजविराज : सप्तरीमा शुक्रबार सम्पन्न मदन भण्डारी स्मृति गोल्ड कप फुटबल प्रतियोगिताको उपाधि सिरहाले हासिल गरेको छ। सप्तकोसी नगरपालिका फत्तेपुरमा सम्पन्न फाइनल खेलमा गाइघाट फुटबल क्लब उदयपुरलाई ३–० गोल अन्तरले पराजित गर्दै सहलेस फुटबल क्लब सिरहाले उपाधि हासिल गरेको हो। उपाधिसँगै सिरहाले नगद २ लाख रुपियाँसहित ट्रफी, मेडल र प्रमाणपत्र प्राप्त गरेको छ।
सिराहाको तर्फबाट मार्टिनले २ गोल गरे भने रुप लामाले १ गोल गरे। उपविजेता उदयपुरले १ लाख नगद रुपैयाँसहित ट्रफी, मेडल, प्रमाणपत्र प्राप्त गरेको छ। सिरहाले बागमती फुटबल क्लब सर्लाहीलाई तथा उदयपुरले आयोजक सप्तरीलाई पराजित गर्दै फाइनल प्रवेश गरेको थियो।
प्रतियोगिताको समापन समारोहमा प्रमुख अतिथि मदन भण्डारी स्पोर्ट्स एकेडेमीका अध्यक्ष ध्रुब आचार्यले विजेता र उपविजेता टिमलाई पुरस्कार बितरण गरे। राष्ट्रियस्तरका खेलाडीहरू सम्मिलित प्रतियोगितामा प्रदेश नम्बर १ र मधेस प्रदेशका ८ ओटा जिल्लाका टिमको सहभागिता रहेको थियो।
प्रतिक्रिया दिनुहोस !
