जनकपुरधाम : सत्तारुढ गठबन्धनको घटक दल जनता समाजवादी पार्टी नेपालमा टिकट वितरणको विषयलाई लिएर कुटाकुट भएको छ । आसन्न स्थानीय तहको निर्वाचनका लागि गठबन्धन आवद्ध अन्य दलहरुलाई उम्मेदवारी छनोट सकस भइरहेको समयमा जनता समाजवादी पार्टीमा टिकट वितरणलाई लिएर कुटाकुट भएको हो ।
आइतबार बिहान जनकपुरधामस्थित होटेल राजदरवारमा बसेको बैठकमा टिकट वितरण विषयमा भएको विवादले उग्ररुप लिँदा नेता तथा कार्यकर्ताबीच कुटाकुट भएको हो । कुटपिटको क्रममा जसपा नेपालका केन्द्रीय कार्यकारिणी सदस्य गजाधर रोहिता यादव, जसपा निकट विद्यार्थीका प्रदेश उपाध्यक्ष विकास यादव सहित १० जना नेता तथा कार्यकर्ताहरु घाइते भएको जसपा धनुषाले जनाएको छ । उनीहरुलाई सामान्य चोटपटक लागेको छ ।
स्रोतका अनुसार धनुषाको गणेशमान चारनाथ नगरपालिकाका मेयर समेत रहको रामबाबु यादव, हँसपुर नगरपालिकाको टिकटका लागि रामनारायण कापडि र शहिदनगर नगरपालिकाको टिकटको लागि बरुण यादवले नपाएको भन्दै आक्रोशित समर्थकहरुले विवाद निकाल्दै नेतामाथि हातपात गरेका थिए ।
मधेश प्रदेशभरकै पालिकामा उम्मेदवारी छनोट निष्कर्षमा पुर्याउन बिहानदेखि बसेको बैठकस्थलमा आएर आकांक्षी उम्मेदवारहरुले टिकटका लागि नेताहरुलाई दबाब दिँदै आएका थिए । तर, नेताहरुले उनीहरुलाई टिकट नदिइ अरुलाई दिएको भन्दै आक्रोशित कार्यकर्ताहरुको भीडले बैठकमा बसेका संघ सरकारका भौतिक पूर्वाधार तथा यातायात मन्त्री रेणुकुमारी यादव, जसपा मधेश प्रदेशका अध्यक्ष रामबाबु कुमार यादव र गजाधर रोहिता यादव लगायतका शीर्ष नेताहरुको समेत उपस्थितिमा भइरहेको बैठकमा कुटपीट गरेका थिए।
प्रतिक्रिया दिनुहोस !
