अन्तिम समयमा एमालेले गर्‍यो उम्मेदवार फेरबदल, बहालवाला मेयरको टिकट खोसियो

ढल्केवर(धनुषा) : नेकपा एमालेले धनुषाको मिथिला नगरपालिकाको मेयर पदको लागि राजाराम महतोलाई उम्मेदवार बनाएको छ । पार्टीको नगर कमिटीले सर्वसम्मतरुपमा बहालबाला मेयर हरिनारायण महतोलाई एकल सिफारिस गरेपनि पार्टीले अन्तिम समयमा उम्मेदवार फेरबदल गरेको हो ।

पार्टीले आफूलाई मेयरको टिकट दिएको प्रत्यासी राजाराम महतोले अन्नपूर्णलाई जानकारी दिए । उनले २ बजेअघिनै ढल्केवरस्थित निर्वाचन अधिकृतको कार्यालय पुगेर मनोनयन दर्ता गराउने तयारी गरिरहेको बताए । महतोले अघिल्लो चुनावमा स्वतन्त्रबाट मिथिला नगरपालिकाको मेयर पदमा ३ हजार ५१५ मत ल्याएर पराजित भएको थिए । कांग्रेसबाट वागी उम्मेदवार बनेका महतो मतपरिणाममा तेस्रो स्थानमा थिए । मेयरमा एमालेका हरिनारायण महतो ६ हजार ७४० मत प्राप्त गरी विजयी भएका थिए । उनको निकटतम प्रतिद्वन्द्वी नेपाली कांग्रेसका राजकुमार महतोले ५ हजार १७८ मत प्राप्त गरेका थिए ।

तेस्रो स्थानमा रहेका राजाराम महतोलाई केही वर्षअघि मात्रै बहालबाला मेयर हरिनारायण महतोलेनै पहल गरेर एमालेमा भित्र्याएका थिए । तर, एमालेबाट पुनः मेयरका लागि एकल सिफारिस भएका हरिनारायणको टिकट खोसेर अन्तिम समयमा राजारामलाई मेयरको टिकट दिएपछि हरिनारायण पक्षका नेताकार्यकर्ता रुष्ट बनेका छन् ।

अहिले हरिनारायण पक्षधरहरु आकस्मिक बैठक डाकेर छलफलमा जुटेका छन् । नेताकार्यकर्ता, समर्थक तथा शुभेच्छुकरुको मनोभावअनुसार सबै वडामा उम्मेदवारी दिँदै स्वतन्त्रबाट चुनाव लड्ने तयारी गरिने हरिनारायण निकट एक नेताले जानकारी दिए ।

यसअघि मिथिला नगरपालिका एमालेको नगर कमिटी बैठकले सर्वसहमति रुपमा पुनः हरिनारायण महतोलाई उम्मेदवार बनाउने निर्णय गरेको थियो ।