सिन्धुली : सिन्धुलीमा गठबन्धन दलका जिल्ला नेताले नेता कार्यकर्तालाई एकतावद्ध भएर चुनावमा केन्द्रीत हुन निर्देशन दिएका छन् । नेपाली कांग्रेस र नेकपा माओवादी केन्द्रका नेताहरुले गठबन्धनको मर्म र पार्टीको निर्देशनअनुसार आफ्ना उमेदवारलाई विजयी गराउन लाग्न निर्देशन दिएका हुन् ।
जिल्लाको सूनकोशी गाउँपालिका र गोलन्जोर गाउँपालिकाका नेता ,कार्यकर्ता र उमेदवारहरुलाई गठबन्धनका विरुद्ध नलाग्न निर्देशन दिइएको हो । नेकपा माओवादी केन्द्रका केन्द्रीय सदस्य तथा जिल्ला इन्चार्ज राजन दाहालले यो गठबन्धन प्रतिगनकाविरुद्ध उत्कर्ष नै भएको दावी गर्दै गठबन्धनका उमेदवारविरुद्ध लाग्न कसैलाई पनि छुट नभएको बताए ।
'राष्ट्रिय परिवर्तनका लागि भएको क्रान्ति, अग्रगमन, संविधान र लोकतन्त्रको रक्षाका लागि गठबन्धन भएको हो । हामीमा राजनीतिक मुद्दा र एजेण्डा मिलेका कारण सहकार्य भएर चुनामा आएका छौं। हाम्रा कुनै पनि उमेदवारले हारे देशले हार्छ, अग्रगमन पक्षघरको हार हुन्छ,' उनले भने ।
जहानीया राणा शासनविरुद्ध नेतृत्व गर्ने नेपाली कांग्रेस र निरंकुश राजतन्त्रको विरुद्धको आन्दोलनको नेतृत्व गर्ने मओवादी केन्द्रका ऐतिहासिक विरात भएको भन्दै त्यसलाई जनताका बीचमा लैजान र गठबन्धनका उमेदवारलाई विजयी गराउन आ–आफ्नो ठाउँबाट भूमिका खेल्न दाहालले आग्रह गरे ।
नेपाली कांग्रेसका जिल्ला नेता तथा पूर्व महासमिति सदस्य नरेन्द्रजंग थापाले गठबन्धनमा कांग्रेस माओवादी केन्द्रबीच भोट साटासाट गर्दै दुबै दलका संयुक्त उमेदवारलाई विजयी गराउन सबै नेता कार्यकर्तालाई आग्रह गरे । उनले भने, 'हामी पार्टीका असल नेता कार्यकर्ता हौं । हामीले पार्टीको निर्देशनलाई मान्नुपर्छ कसैले गठबन्धविरुद्ध बोल्ने र गठबन्धनलाई हराउन कुनै पनि गतिविधि गर्ने छुट छैन ख्याल राख्नु होला ।'
दुबै पार्टीका नेता कार्यकर्ता र उमेदवारहरुमा व्यक्तिगत स्वभावलाई सच्चाउनुपर्ने र जनताका बीचमा आफ्ना एजेण्डा लिएर जान समेत थापाले आग्रह गरे । उनले गठबन्धनका विरुद्धमा लाग्ने जो कोही नेता कार्यकर्तालाई पार्टीले तत्काल कारबाही गर्ने चेतावनी समेत दिए ।
नेपाली कांग्रेस गोलन्जोरका नेता तथा पालिका अध्यक्षका उमेदवार पुष्प कार्कीले गठबन्धनका उमेदवारहरुलाई एकतावद्ध भएर भोट हाल्ने आग्रह गरे । उनले भने, 'गठबन्धनभित्र असहमति छ भन्ने हाल्ला बाहिर आएको छ । यसमा कुनै शंका गर्नु पर्दैन । हाम्रा एकजना सदस्य पनि चुनावमा हार्दैनन् । तपाईंहरु विगतलाई बिर्सेर वर्तमानमा देश जिताउन लाग्नुहोस् , हामी उसै जित्छौं ।'
जिल्लामा कांग्रेस र माओवादी केन्द्रबीच गठबन्धन भएको छ । दुई नगरपालिकासहित नौं वटा स्थानीय तह भएको सिन्धुलीमा एक नगरपालिकासहित पाँचवटा स्थानीय पालिकाको नेतृत्व नेपाली कांग्रेस र एक नगरपालिका सहित चारवट स्थानीय पालिकाको नेतृत्व नेकपा माओवादीले पाएका छन् ।
कतिपय पालिकाका वडाहरुमा भने गठबन्धनबीच सहमति हुन सकेको छैन् । त्यस्ता वडाहरु समेत शुक्रबारसम्ममा मिलाउन पहल भइरहेको जनाइएको छ । उता नेकपा एमालेले भने जिल्लामा सबै पालिकाका वडासम्मै एक्लै उमेदवारी दर्ता गराएको छ ।
साना राजनीतिक दल र स्वतन्त्र उमेदवारहरु समेत चुनावी प्रचार प्रसारमा निस्केका छन् ।
प्रतिक्रिया दिनुहोस !
