ढल्केवर(धनुषा) : आसन्न स्थानीय तहको निर्वाचनका लागि उम्मेदवारहरुले चुनाव चिन्ह पाएसँगै मतदाता रिझाउन घरदैलो अभियान सुरु गरेका छन् । चुनाव चिन्ह पाएसँगै स्वतन्त्र तथा राजनीतिक दलका उम्मेदवारहरु चुनावी प्रचारप्रसारमा होमिएका हुन् । मतदाताहरुलाई आफ्नो पक्षमा पार्न विभिन्न एजेण्डाहरु लिएर उम्मेदवारहरु घरदैलो अभियानलाई तीव्र पारेका छन् । धनुषाको मिथिला नगरपालिकामा पनि उम्मेदवारहरु नगरको विभिन्न वडाबाट घरदैला अभियान सुरु गरेका छन् ।
मिथिला नगरपालिकाको मेयरका लागि २० जना उम्मेदवार चुनावी मैदानमा छन् । सतारुढ दल नेपाली कांग्रेस र नेकपा एकीकृत समाजवादी एक्लाएक्लै लडे पनि नेकपा माओवादी केन्द्र र जनता समाजवादी पार्टी तालमेल गरेर चुनावी मैदानमा उत्रिएका छन् । माओवादीले मेयर र जसपाले उपमेयरको उम्मेदवार बनाएर गठबन्धन गरेको छ ।
मेयर पदमा नेपाली कांग्रेसबाट महेन्द्र महतो, नेकपा माओवादी केन्द्रबाट रामकुमार महतो, नेकपा एकीकृत समाजवादीबाट सूर्यप्रसाद पुडासैनी, लोकतान्त्रिक समाजवादी पार्टी नेपालबाट राजकुमार थापा, जनमत पार्टीबाट सरोज कुमार सिंह र राष्ट्रिय प्रजातन्त्र पार्टीबाट जनक कुमार कार्कीलगायत २० जना चुनावी प्रतिस्पर्धामा उत्रिएका छन् ।
समय कम रहेकाले घरदैलो अभियानलाई तीव्रता दिएको नेकपा माओवादी केन्द्रका मेयरका प्रत्यासी रामकुमार महतोले बताए । उम्मेदवारहरुले वैशाख २७ गतेसम्म चुनाव प्रचार प्रसार गर्न पाउने समयाअवधि तोकिएको छ । २०७४ को स्थानीय तह निर्वाचनमा एमालेका हरिनारायण महतोले कांग्रेस–माओवादी गठबन्धनलाई पराजित गर्दै मिथिला नगरपालिकाको मेयरमा विजयी भएका थिए ।
मेयरका लागि उनले दोस्रो पटक दोहोरिन पार्टीमा आकांक्षा राखेका थिए । तर, पार्टीले अन्तिम समयमा राजाराम महतोलाई उम्मेदवार बनाएपछि असन्तुष्ट बनेका हरिनारायणले मेयरमा स्वतन्त्र उम्मेदवारी दर्ता गराएका थिए । पछिल्लो समय मेधसमा एमाले अध्यक्ष केपी शर्मा ओलीको विश्वास पात्र मानिएको हरिनारायणले पार्टीको निर्णयविरुद्धमा उभिएपछि उनलाई फकाउन ओलीले काठमाडौं नै बोलाएका थिए ।
ओलीसँग सहमतिपछि उम्मेदवारी फिर्ता लिएर एमालेबाटै मेयरमा उठेका राजारामलाई सघाउन हरिनारायण तयार भएका हुन् । एमालेबाट बागी बनेर मेयरको दौडमा रहेका हरिनारायण ब्याक भएपछि प्रतिस्पर्धाका लागि एमाले उम्मेदवारलाई सहज भएको छ ।
प्रतिक्रिया दिनुहोस !
