रसुवा : रसुवामा क्यापासिटर बैंक राख्ने काम अझै सुरु भएको छैन। भोल्टेजको गुणस्तर कायम गर्न र उद्योगमा विद्युत् लोडको मागलाई सन्तुलन बनाउनका लागि क्यापासिटर राख्नुपर्ने हुन्छ।
जिल्लामा क्यापासिटर बैंक नराख्ने ग्राहकको संख्या तीन सयको हाराहारीमा छ। विद्युत मोटर र वेल्डिङ मेसिन जडान गर्ने ग्राहकले क्यापासिटर बैंक राख्नुपर्ने भएपनि धेरैले नराखेको पाइएको नेपाल विद्युत् प्राधिकरण धुन्चे वितरण केन्द्रले जनाएको छ।
नेपाल विद्युत् प्राधिकरणले क्यापासिटर बैंक नराख्ने ग्राहकको लाइन काट्न केही समयअघि कार्यालयहरूलाई परिपत्र गरेको थियो। तर जिल्लामा क्यापासिटर नपाइने भएकाले अहिलेसम्म लाइन नकाटिएको केन्द्रका प्रशासन प्रमुख एवं सूचना अधिकारी दीपरमण अधिकारीले बताए। ‘अहिले हामीले यसको कार्यान्वयनका लागि काम अघि बढाएका छौं’, उनले भने, ‘तर जिल्लामा क्यापासिटर नपाइने भएकाले समस्या छ।’ नेपाल विद्युत् प्राधिकरण विद्युत् वितरण विनियमावली २०७८ का अनुसार प्राधिकरणले ५ किलोवाटभन्दा बढी क्षमताको विद्युत् मोटर वा वेल्डिङ मेसिन भएका ग्राहककोमा मिटर जडान गर्दा शन्ट क्यापासिटर अनिवार्यरूपमा जडान गर्न लगाउनुपर्ने उल्लेख छ।
प्रतिक्रिया दिनुहोस !
