परासी : पश्चिम नवलपरासीका ७ स्थानीय तहमा कतै दुई पक्षीय त कतै त्रिपक्षीय प्रतिस्पर्धा हुने देखिएको छ। प्रमुख र उपप्रमुख एकै दलको आउने संभावना कम देखिएको छ।
जिल्लाकै पुरानो नगरपालिका रहेको सदरमुकाम परासीस्थित रामग्राम नगरपालिकामा त्रिपक्षीय प्रतिस्पर्धा हुने देखिएको छ। यहाँ नेपाली कांग्रेस, एमाले र जनता समाजवादी पार्टी (जसपा) बीच प्रतिस्पर्धा हुने देखिएको हो। जसपाले माओवादी केन्द्रसँग गठबन्धन गरेको छ। यी तीनदलबीच प्रमुख पदमा प्रतिस्पर्धा देखिएको हो। उपप्रमुखमा नेपाली कांग्रेस र एमालेसँगै राप्रपाका उम्मेदवार पनि प्रतिस्पर्धामा छन्। रामग्राम नगरपालिकामा यसअघिको चुनावमा नेपाली कांग्रेसले प्रमुख/उपप्रमुख जितेको थियो।
त्यस्तै सुनवल नगरपालिकामा नेपाली कांग्रेस/माओवादी केन्द्रको गठबन्धन र एमालेबीच नै प्रमुख प्रतिस्पर्धा हुने देखिएको छ। यसअघि यहाँ कांग्रेसले प्रमुख र एमालेले उपप्रमुख जितेको थियो।
बर्दघाट नगरपालिकामा नेपाली कांग्रेस र एमाले/राष्ट्रिय जनमुक्ति पार्टीको गठबन्धनबीच प्रतिस्पर्धा छ। यसअघि यहाँ प्रमुख/उपप्रमुखमा एमालेले जितेको थियो। सरावल गाउँपालिकामा कांग्रेस र एमालेबीच नै प्रतिस्पर्धा हुने देखिएको छ। सरावलमा यसअघि यहाँ तत्कालीन फोरम लोकतान्त्रिक (पछि कांग्रेसमा समाहित) ले अध्यक्ष र कांग्रेसले उपाध्यक्षमा जितेको थियो। पाल्हीनन्दन गाउँपालिकामा नेपाली कांग्रेस र माओवादी केन्द्रबीच प्रतिस्पर्धा हुने देखिएको छ।
यसअघि यहाँ माओवादी केन्द्रले अध्यक्ष र कांग्रेसले उपाध्यक्ष जितेको थियो। त्यस्तै सुस्ता गाउँपालिकामा कांग्रेस र एमाले नै प्रमुख प्रतिस्पर्धामा छन्। यसअघि एमालेले अध्यक्ष र उपाध्यक्ष जितेको थियो।
प्रतापपुर गाउँपालिकामा कांग्रेस र एमालेबीच प्रतिस्पर्धा देखिएको छ। यसअघि यहाँ नेपाली कांग्रेसले अध्यक्ष र उपाध्यक्ष जितेको थियो।
प्रतिक्रिया दिनुहोस !
