प्रचण्ड र नेपालले ओलीको मृत्युमा जीवन देखे : नेता भट्ट
वैशाख २६, २०७९ सोमबार १२:१०:०
जोरायल (डोटी) : नेकपा एमालेका केन्द्रीय सचिव तथा सुदूरपश्चिम ईञ्चार्ज लेखराज भट्टले प्रचण्ड र नेपालले केपी ओली शर्माको मृत्युमा आफ्नो जीवन देखेको आरोप लगाएका छन्। डोटीको जोरायल गाउँपालिकामा चुनावी सभालाई सम्बोधन गर्दै नेता भट्टले आफूले केपी ओलीको जीवनमा आफ्नो जीवन देखेको तर प्रचण्ड र नेपालले ओलीको मृत्युमा आफ्नो जीवन देखेको भन्दै टिप्पणी गरे।
'नेकपा माओवादी केन्द्र र नेकपा एमालेको एकीकरणपछि हामीले बाम एकताको सपना देख्यौं, दुई नेताले बामपन्थी आन्दोलन हाक्छन् भन्ने सोच्यौं, हामीले केपी ओलीको जीवनमा आफ्नो जीवन देख्यौं तर प्रचण्ड र नेपालले ओलीको मृत्युमा आफ्नो जीवन देखेछन,' उनले भने,'प्रचण्ड र नेपालले एउटा पार्टीलाई तीन टुक्रा पारे ।'
अहिले प्रचण्डले नकपा एमाललाई सबैभन्दा ठू्लो वर्गशत्रु ठानिरहेको बताए । ‘जसले प्रचण्डको ५० लाख टाउकोको मुल्य तोक्यो, त्यो अहिले उहाँको मित्रशक्ति भएको छ, तर आफैले एकता गरेको पार्टी ठूलो वर्गशत्रु देख्नुभयो,' नेता भट्टले भने, 'प्रचण्ड र नेपालको एक मात्र चाहना नेकपा हराउ भन्ने हो ।'
नेता भट्टले गठबन्धनलाई स्यालहरुको झुण्ड भएको संज्ञा दिए । ‘स्यालहरु समूहमा हुन्छन, कराई मात्र रहन्छन् तर बाघ एक्लै हिँड्छ शिकार गर्छ । नेकपा एमाले बाघ हो, एक्लै हिँड्छ, चुनाव जित्छ,' उनले भने । जोरायल डोटीको दुर्गम गाउँपालिका हो । त्यहाँ नेकपा एमाले र नेपाली कांग्रेस एक्ला एक्लै चुनावमा होमिएका छन् । नेकपा माओवादी केन्द्र र नेकपा एकीकृत समाजवादी बीचमा चुनावी तालमेल भएको छ । त्यो क्षेत्र मन्त्री प्रेम आलेमगरको पनि क्षेत्र हो ।
कार्यक्रममा नेकपा एमाले पोलिटब्युरो सदस्य तथा डोटी जिल्ला ईञ्चार्ज गौरी ओली, केन्द्रीय सल्लाहकार परिषद सदस्य डिल्लीराज भट्ट र नेकपा एमालेका प्रदेश सचिव धर्मराज पाठकलगायतले सम्बोधन गरेका थिए । 
प्रतिक्रिया दिनुहोस !
