प्रचण्डले बागीलाई भोट मागेपछि देउवाले भने - 'बागी जति सबै उम्मेदवारी फिर्ता लिनुहोस्, नत्र कारबाही हुन्छ'
वैशाख २६, २०७९ सोमबार १६:५२:०
धनगढी : कैलालीको कैलारी गाउँपालिका पुगेर गठबन्धनको निर्णय विपरित बागी उम्मेदवारका लागि प्रचण्डले भोट मागेको केही घण्टामै प्रधानमन्त्री तथा कांग्रेस सभापति शेरबहादुर देउवाले बागीले उम्मेदवारी फिर्ता नलिए कारबाही गर्ने चेतावनी दिएका छन् ।
माओवादी केन्द्रका अध्यक्ष पुष्पकमल दाहाल ' प्रचण्ड' ले बागी उम्मेदवारलाई भोट माग्दै गठबन्धन 'क्लियर' नभएको अभिव्यक्ति दिएका थिए। कैलालीमा कैलाली र जोशीपुरमा नेपाली कांग्रेसका बागी उम्मेदवारले गठबन्धनको निर्णय विपरित कार्य गरेको भन्दै देउवाले आजै उम्मेदवारी फिर्ता लिएको विज्ञप्ति जारी गर्न निर्देशन दिए ।
मनोनयनको समय घर्किरहेका बेला गठबन्धनमा सहमति नमिलेपछि कैलारी गाउँपालिकामा नेकपा माओवादी केन्द्र र नेपाली कांग्रेस दुबै पार्टीले अध्यक्ष र उपाध्यक्षमा उम्मेदवारी दिएका थिए । मनोनयन पछि कैलारी गाउँपालिमा अध्यक्ष माओवादी केन्द्र र उपाध्यक्ष नेपाली कांग्रेसका भागमा परेको थियो ।
तर, नेपाली कांग्रेसबाट अध्यक्षमा उम्मेदवारी दिएका राम समझ चौधरी र नेकपा माओवादी केन्द्रबाट उम्मेदवारी दिएकी लक्ष्मी सत्गौवा थारुले भने उमेदवारी फिर्ता गरेका छैनन् । अध्यक्षमा कांग्रेसले राम समझलाई फिर्ता नगराएको भन्दै प्रचण्डले सोमबार बिहान कैलारी गाउँपालिकामा नै पुगेर लक्ष्मी सत्गौवा थारुका लागि भोट भागेका थिए ।
त्यसको केही घण्टापछि धनगढीमा गठबन्धनको संयुक्त चुनावी सभालाई सम्बोधन गर्दै देउवाले दुबै पालिकामा बागी उम्मेदवारी दिएकाहरुलाई आजै उम्मेदवारी फिर्ता गर्न निर्देशन दिएका हुन् । ‘पार्टीले आधिकारिक भनेर तोकेका उम्मेदवारले आजै फिर्ता लिनुहोस्, विज्ञप्ति निकालेर गठबन्धनको उम्मेदवारलाई समर्थन गर्नुहोस्, हामी बागीकै कारण यसअघि पनि हारेका हौं, हैन भने बागीलाई कडा कारबाही गरिन्छ,' देउवाले भने ।
प्रतिक्रिया दिनुहोस !
