रसुवा लाङटाङका मतदाता हेलिकप्टर चढेर गाउँ आए

रसुवा : शुक्रबार हुने स्थानीय तहको निर्वाचनको लागि रसुवाको लाङटाङमा हेलिकप्टर चढेर मतदाता गाउँ आएका छन् । जिल्लाको गोसाइँकुण्ड गाउँपालिका–४ मा पर्ने लाङटाङ, क्यान्जिन, मुण्डुप लगायतका क्षेत्रका स्थानीय हेलिकप्टर मार्फत गाउँ आएका हुन् । 

क्यान्जिनका स्थानीय ग्याल्बु लामाका अनुसार मतदानका लागि २० जना मतदाता हेलिकप्टर चढेर गाउँ आएका हुन् । यस क्षेत्रका सडक विस्तार नभएका कारण यसअघिका निर्वाचनमा पनि मतदाता हेलिकप्टर चढेर नै आउने गरेका थिए । 
 

काठमाडौं बस्ने तथा विभिन्न देशमा पुगेका मतदाता पनि चुनावको समयमा गाउँ आउने गरेका उनको भनाइ छ । काठमाडौंबाट स्याफ्रुसम्म गाडीमा जाने र त्यसपश्चात २ दिनको पैदलयात्रा गरेर लाङटाङ पुगिन्छ । पर्यटकीय क्षेत्रको सौन्दर्य जोगाउन र र यस क्षेत्रमा आउने पर्यटक हिँड्न मनपराउने भएका कारण सडक विस्तार नगरिएको हो । यहाँका मतदाताले गोसाइँकुण्ड गाउँपालिका–४ स्थित सामुदायिक भवनमा मतदानदान गर्छन । केन्द्र यही छ । यस केन्द्रमा ३ सय ६३ मतदाता रहेका छन् । 

मुख्य निर्वाचन कार्यालयका अनुसार मतदान केन्द्रका लागि मतदान अधिकृत गोपी विश्वकर्मा, सहायक मतदान अधिकृत प्रेम शंकर प्रसाद, सहायक कर्मचारी राजकुमार थापा पहारी र कार्यालय सहयोगीको रूपमा नन्दलाल न्यौपाने खटाइएको छ । निर्वाचन टोलीले बुधबार सर्वदलीय बैठक राख्ने जनाएको छ । 

५ सयभन्दा कम मतदाता रहेका केन्द्रमा ४ जना कर्मचारी खटाइने प्रावधान अनुसार कर्मचारी खटाइएको हो । जिल्लामा ३८ हजार ५ सय ४५ मतदाता रहेका छन् । जसमा १९ हजार ६ सय ८९ पुरुष र १८ हजार ८ सय ८५ महिला रहेका छन् ।