तेह्रथुम : तेह्रथुमको मेन्छ्यायेम गाउँपालिकाको अध्यक्षमा यादवबहादुर खापुङ र उपाध्यक्षमा गीतादेवी तिम्सीना दोहोरिएका छन्। २०७४ को निर्वाचनमा पनि फरकफरक दलबाट अध्यक्ष र उपाध्यक्ष जितेका खापुङ र तिम्सिनाले यसपटक पनि रोचक प्रतिस्पर्धाकाबीच विजयी भएका हुन्।
अध्यक्ष उम्मेदवार खापुङ नेकपा एमालेका उम्मेदवार हुन् भने उपाध्यक्ष तिम्सिना नेपाली कांग्रेसकी उम्मेदवार हुन्। यहाँ एमालेको उपाध्यक्ष उम्मेदवार र कांग्रेसका अध्यक्ष उम्मेदवार यसपटक पनि पराजित भएका छन्।
अध्यक्षमा निर्वाचित खापुङले २ हजार ५५ मत ल्याएर विजयी भएका हुन्। उनका प्रतिद्धन्दी नेपाली कांग्रेसका धनकुमार लिम्बूलाई ३४ मतले पछि पार्दै खापुङले विजय हासिल गरेका हुन्। लिम्बूले २ हजार २१ मत प्राप्त गरेको निर्वाचन अधिकृत ध्रुव कार्कीले जानकारी दिए।
उपाध्यक्षमा तिम्सिनाले १ हजार ९ सय ८६ मत प्राप्त गरिन्। एमालेकी प्रेमलता घिमिरेले १ हजार ९ सय ७४ मतप्राप्त गरिन्। जिल्ला समन्वय समितिको निवर्तमान उपप्रमुख घिमिरे १२ मतले पराजित भइन्।
मेन्छ्यायेममा १, ४, ५, र ६ नम्बर वडामा एमाले विजयी भएको छ भने २ र ३ नम्वर वडामा नेपाली कांग्रेसका उम्मेदवार विजयी भएका छन्।
प्रतिक्रिया दिनुहोस !
