खिजीदेम्वामा जसपा विजयी, कांग्रेसले उपाध्यक्ष जित्दा एमाले क्लिन स्वीप

ओखलढुंगा : खिजीदेम्वा गाउँपालिका अध्यक्षमा जसपाका गम्बु शेर्पा विजयी भएका छन्।

नेपाली कांग्रेसको गढ मानिएको खिजीदेम्बामा जनता समाजवादीका उम्मेदवार शेर्पाले कांग्रेसका भुपेन्द्र बस्नेतलाई १३० मतान्तरले पराजित गरे। उनले २ हजार ८८२ मत ल्याएर विजयी भए। कांग्रेसका बस्नेतले २ हजार ७५२ मत पाए। एमालेका रामबहादुर खत्रीले १ हजार ७१५ मत ल्याएर तेस्रो भए।

उपाध्यक्षमा कांग्रेसकी सुशिला तामाङ विजयी भएकी छन्। उनले २ हजार ८२४ मत ल्याउँदा जसपाले २ हजार २४१ र एमालेले उपाध्यक्षमा १ हजार ७१५ मत पाएको छ।

यसअघि खिजीदेम्बा नेपाली कांग्रेसको गढ थियो। यो कांग्रेसका पूर्वजिल्ला सभापति महेश कोर्मोचा र हालका केन्द्रीय सदस्य प्रदीप सुनुवारको गाउँ पनि हो। २०७४ को स्थानीय निर्वाचनमा अध्यक्ष उपाध्यक्षसहित बहुमत सिट कांग्रेसले जितेको थियो।

हाल ९ वटा वडा रहेको खिजीदेम्बाका ७ वडा कांग्रेस र २ वटा वडा जसपाले जितेको छ। कांग्रेसबाट वडा नम्बर २ मा सुरेन्द्रशंकर घिमिरे, ३ मा टंकराज सुनुवार, ४ मा होमबहादुर सुनुवार, ५ मा राम सुनुवार, ७ मा डिल्लीराम बस्नेत, ८ मा नगेन्द्र बस्नेत र वडा नम्बर ९ मा ङ्वाङफुरी शेर्पा विजयी भए।

जसपाका वडा नम्बर १ मा कुमार सुनुवार र ६ मा पासाङनिमा शेर्पाले जित हात पारे। अधिकांश वडा जिते पनि कांग्रेसले प्रमुखमा भने पराजय व्यहोरेको छ।

एमाले क्लीन स्वीप

२०७४ को निर्वाचनमा एमालेले ४ वडा जितेको एमाले यो पटक क्लीन स्वीप भएको छ। एमाले जिल्ला सचिव कमल न्यौपाने, प्रदेश सदस्य सुदिप सुनुवार तथा पालिका अध्यक्षका उम्मेदवार नेता रामबहादुर खत्रीका वडा समेत गुमाएको एमालेले पालिकाका ९ वडाभरिमा १ वडा सदस्यमा चित्त बुझाउनु परेको छ। अहिले वडा नम्बर २ मा १ सदस्य भने जित्न सकेको छ। २०७४ को निर्वाचनमा एमालेले ४ वटा वडा अध्यक्षसहित १७ पदाधिकारी जितेको थियो।

एमालेभित्रको गुटबन्दी र अन्तर्घातका कारण एमाले दोस्रोबाट तेस्रो शक्तिमा पुगेको छ। २०७४ पनि अन्तरघातकै कारण एमाले पराजित भएको थियो। जसपा भने डेढ वर्षमा पहिलो शक्तिका रुपमा उदाउन सफल भएको छ । विगत १८ महिनादेखि निरन्तर संगठनको काम गरेका जसपाका शेर्पाले पुराना र ठुला दलहरुलाई पराजित गरेर जसपालाई स्थापित गर्न सफल भएका छन्।