बेनी : म्याग्दीको धवलागिरी गाउँपालिकाको अध्यक्षमा नेपाली कांग्रेस र उपाध्यक्षमा नेकपा माओवादी केन्द्रका उमेद्वार विजयी भएका छन् ।
स्थानीय तह चुनावमा धवलागिरीमा नेपाली कांग्रेस र माओवादी केन्द्रले तालमेल गरेका थिए । गठबन्धनबाट अध्यक्षमा कांग्रेसका प्रेमप्रसाद पुनले तीन हजार १२३ र उपाध्यक्षमा माओवादीका रेशम पुनले दुई हजार ८१२ मत पाएर निर्वाचित भएका सहायक निर्वाचन अधिकृत पूर्णबहादुर खत्रीले जानकारी दिए ।
अध्यक्षमा नेकपा एमालेकी उमेद्वार थमसरा पुनले दुई हजार ५४८ र उपाध्यक्षमा एमालेका प्रगति कार्कीले दुई हजार ६१८ मत पाएका निर्वाचन अधिकृतको कार्यालयले जनाएको छ । सात वटा वडा रहेको धवलागिरी गाउँपालिकामा नेपाली कांग्रेसले २, एमालेले ३ र माओवादीले २ वटा वडामा अध्यक्ष जितेका छन् । गत चुनावमा धवलागिरीमा माओवादी र कांग्रेसले तालमेल गरे पनि एक एक वटा मात्र वडा जितेका थिए । यसपालि एमालेको गड भत्काएर जित हाँसिल गरेका हुन् ।
वडा नम्बर १ मा गठबन्धनबाट माओवादीका झक छन्त्याल, २ मा एमालेका अकप्रसाद विक, ३ मा कांग्रेसका देवेन्द्र रोका, ४ मा एमालेका यामबहादुर घर्ती, ५ मा कांग्रेसका अमर छन्त्याल, ६ मा एमालेका राजाराम उपाध्याय र ७ मा माओवादीका अशोक खत्री निर्वाचित भएका छन् ।
खत्रीले ७५२ मत ल्याएर वडा अध्यक्षमा निर्वाचित हुँदा उनका प्रतिस्पर्धी एमालेका खुमबहादुर थापा (राजु)ले ६१८ मत पाएका छन् । वडा सदस्यहरु गठबन्धनका उमेद्वार निर्वाचित भएका छन् । १० हजार ९४० मतदाता रहेको धवलागिरीमा ६१ दशमलब १८ प्रतिशत अथवा छ हजार ६९४ मत खसेको थियो । ३७ पदका लागि ८४ जना प्रतिस्पर्धामा थिए ।
म्याग्दीको ६ वटा मध्य चार वटा स्थानीय तह र ३६ वटा वडाको मतगणना सकिएको छ । मतपरिणाम सार्वजनिक भएका ३६ वटा वडामध्ये एमालेले १९, कांग्रेसले १३ र माओवादीले ६ वटा वडामा जित हाँसिल गरेका छन् । ८ वटा वडा, बेनी नगरपालिका र अन्नपूर्ण गाउँपालिकाको अन्तिम मतपरिणाम आउन बाँकी छ ।
प्रतिक्रिया दिनुहोस !
